જાપાનના એન્જિનીયર્સે હમણાં ઇન્ટરનેટ સ્પીડનો નવો વિક્રમ સ્થાપ્યો. ફાઇબર ઓપ્ટિક કમ્યુનિકેશન વિશે યોજાયેલી એક ઇન્ટરનેશનલ કોન્ફરન્સમાં આ વિશેનો સ્ટડી પ્રેઝન્ટ કરવામાં આવ્યો.
આ પ્રેઝન્ટેશન અનુસાર જાપાનના એન્જિનીયર્સે ત્રણ હજાર કિલોમીટરની લંબાઈમાં પથરાયેલા એક ફાઇબર કેબલમાં દર સેકન્ડે ૩૧૯ ટેરાબાઇટ ડેટા ટ્રાન્સફર કરવાની સિદ્ધિ મેળવી! હજી બે વર્ષ પહેલાં દર સેકન્ડે ૪૪.૨ ટેરાબાઇટના દરે ડેટા ટ્રાન્સફર કરવાનો વિક્રમ નોંધાયો હતો. ત્યાર પછીના વર્ષે, એટલે કે ગયા વર્ષે લંડનના સંશોધકોએ દર સેકન્ડે ૧૭૮ ટેરાબાઇટની વિક્રમી ઝડપ મેળવી હતી.
કોરા આંકડાની વાત કરીએ તો એક ટેરાબાઇટમાં ૧૦૦૦ ગિગાબાઇટ્સ ને એક ગિગાબાઇટમાં ૧૦૦૦ મેગાબિટ્સ ડેટા હોય છે.
હવે સાદી રીતે આ ઝડપ સમજવાની કોશિશ કરીએ. તમારા અત્યારના બ્રોડબેન્ડ કનેક્શનથી, નેટફ્લિક્સની કોઈ એક મૂવી ડાઉનલોડ કરતાં કેટલો સમય લાગે છે એ તપાસી જુઓ. નિષ્ણાતો કહે છે કે ગયા વર્ષની વિક્રમી ઝડપે, નેટફ્લિક્સનો આખેઆખો મૂવી ડેટાબેઝ એક સેકન્ડ કરતાં ઓછા સમયમાં ડાઉનલોડ થઈ શકે છે. જાપાનનો વિક્રમ તેનાથી પણ લગભગ બમણી ઝડપ આપે છે! હજી વધુ નોંધવા જેવી વાત એ પણ છે કે જાપાની એન્જિનીયર્સે જે વિક્રમ નોંધાવ્યો છે તે માત્ર લેબોરેટરી કન્ડિશનમાં જ કામ આપે તેવો નથી, હાલના મોડર્ન ફાઇબર ઓપ્ટિક ઇન્ફ્રાસ્ટ્રકચરમાં પણ તેનો ઉપયોગ થઈ શકે તેમ છે!
