કોરોનાની બીજી લહેર દરમિયાન રોજિંદા બધાં કામકાજની જેમ આપણાં બેન્ક સંબંધિત કામ પણ ખોરવાઈ ગયા છે એ દરમિયાન થોડા રાહતના સમાચાર આવ્યા છે.
અત્યાર સુધી બેન્કમાં ‘નો યોર કસ્ટમર’ (કેવાયસી)ની પ્રક્રિયા પૂરી કરવા માટે આપણે જરૂરી દસ્તાવેજો રૂબરૂ આપવા જવું પડતું હતું હવે વિવિધ બેન્ક આ પ્રક્રિયા ઓનલાઇન કરી રહી છે.
જેમ કે હમણાં સ્ટેટ બેન્ક ઓફ ઇન્ડિયાએ જાહેર કર્યા મુજબ તેના ખાતા ધારકો પોતાના સરનામા, તથા ઓળખ અને અન્ય કેવાયસી દસ્તાવેજો સ્કેન કરીને પોતાના બેન્કમાં રજિસ્ટર્ડ ઇમેઇલ એડ્રેસથી પોતાની બેન્કની બ્રાન્ચના ઇમેઇલ એડ્રેસ પર મોકલી શકે છે.
દરમિયાન રિઝર્વ બેન્ક ઓફ ઇન્ડિયાએ પણ બેન્ક ખાતાધારકો સમયસર કેવાયસી પ્રક્રિયા પૂરી કરી ન શકે તો તેમની સામે કોઈ પગલાં લેવાની બેન્કોને મનાઈ ફરમાવી છે.
