બહુ લાંબો સમય કાયદાકીય ગૂંચવણોમાં અટવાયેલી રહેલી વોટ્સએપ પેમેન્ટ સર્વિસ આખરે લગભગ તમામ યૂઝર્સ માટે લોન્ચ થઈ ગઈ પરંતુ તેને ધાર્યો પ્રતિસાદ મળ્યો નહીં. જ્યારે પહેલી વાર વોટ્સએપમાં યુનિફાઇડ પેમેન્ટ ઇન્ટરફેસ (યુપીઆઈ) આધારિત પેમેન્ટ સર્વિસ લોન્ચ થવાની વાતો ચાલતી હતી ત્યારે સૌની ધારણા એવી હતી કે બહુ મોટા પ્રમાણમાં ભારતીયોના જીવનમાં વણાઈ ગયેલી આ એપ પેમેન્ટ સર્વિસને કારણે ભારતીય બેન્કિંગમાં ગેમચેન્જર સાબિત થશે.

પરંતુ એવું થયું નહીં. તેનાં મુખ્ય ત્રણ કારણ હતાં – એક, વોટ્સએપમાં પેમેન્ટ સર્વિસનો લાભ તમામ યૂઝર્સને મળવામાં ઘણું મોડું થયું. બીજું, ત્યાં સુધીમાં ગૂગલ પે, ફોનપે અને પેટીએમ આ ત્રણેય કંપનીએ યુપીઆઈ પેમેન્ટ્સનું મોટા ભાગનું બજાર સર કરી લીધું હતું. ત્રીજું કારણ એ પણ હતું કે ભારતમાં યુપીઆઈનો ઉપયોગ વધ્યો એ સાથે યુપીઆઈ આધારિત ફ્રોડમાં પણ ઉછાળો આવ્યો!

એ જ સમયે ફેસબુક અને વોટ્સએપમાં પ્રાઇવસીને સંબંધિત વિવાદો પણ જાગ્યા. પરિણામે લોકોએ વોટ્સએપનો ઉપયોગ ચાલુ રાખ્યો પરંતુ તેને પોતાના બેંક એકાઉન્ટ સાથે સાંકળવાનું ટાળ્યું.

હવે વોટ્સએપ કંપની ભારતમાં તેની પેમેન્ટ સર્વિસને ગતિ આપવા માટે નવેસરથી પ્રયાસો કરે તેવી શક્યતા છે. ગૂગલ પેની જેમ વોટ્સએપ પેમેન્ટ્સનો ઉપયોગ કરતા લોકોને કેશબેક ઓફર કરવામાં આવે તેવી શક્યતા છે. વોટ્સએપના બીટા વર્ઝનનો ઉપયોગ કરતા કેટલાક લોકોને આ ફીચર દેખાવા લાગ્યું છે. અલબત્ત તેના પર હજી ડેવલપમેન્ટ ચાલી રહ્યું છે અને તમામ યૂઝર્સને તેનો લાભ મળતાં હજી ઘણી વાર લાગી શકે છે.

વોટ્સએપ કંપની યુપીઆઈ વિશે લોકોમાં જાગૃતિ લાવવા માટે મોટા પાયે જાહેરાતોનું કેમ્પેઇન ચલાવે તેવી પણ શક્યતા છે.

વોટ્સએપમાં આપણે જેટલી સહેલાઈથી ગુડમોર્નિંગ મેસેજની ઇમેજ મૂકી શકીએ છીએ એટલે જ સહેલાઇથી લોકો સાથે રૂપિયાની આપલે કરી શકીએ છીએ, પરંતુ એ માટે વધુ ને વધુ લોકો વોટ્સએપની પેમેન્ટ સર્વિસ પર વિશ્વાસ મૂકે એ જરૂરી છે, જે સહેલાઈથી શક્ય બને એવું લાગતું નથી!