માની લો કે કોઈ ઇ-કોમર્સ કંપની પોતાની નવી મોબાઈલ એપ લોન્ચ કરવા માગે છે. આ એપ અમુક ખાસ પ્રકારના ફીચર્સ સાથે મર્યાદિત સંખ્યામાં યૂઝરને ઉપયોગ કરવા માટે આપવામાં આવશે.
યૂઝર્સ આ એપનો ઉપયોગ કરે અને તેઓ એપની જુદી જુદી બાબતો તપાસી રહ્યા હોય એ સમયે, એપમાંનું પેલું ખાસ ફીચર યૂઝરના ચહેરાના હાવભાવ તથા આંખની મૂવમેન્ટ નોંધતું જશે. તેના આધારે યૂઝર એ એપ વિશે કેવી લાગણી અનુભવી રહ્યા છે, એ ખુશ છે, નિરાશ છે, કે પછી એકદમ રાજી થઈ ઊઠ્યા છે એ પેલું ફીચર જાણી શકશે!
આ કોરી કલ્પના નથી. બેંગ્લુરુની એન્ટ્રોપિક ટેક નામની એક કંપનીએ આર્ટિફિશિયલ ઇન્ટેલિજન્સની મદદથી આવી ટેકનોલોજી વિકસાવી છે. યૂઝર પોતાના મોબાઇલમાં કોઈ પણ કન્ટેન્ટ, એડવર્ટાઇઝમેન્ટ કે એપ જોઈ રહ્યા હોય ત્યારે તેના વિશે યૂઝરના મનમાં ઊઠતી લાગણીઓ ટ્રેક કરી શકાશે અને પછી તેનું એનાલિસિસ કરીને કન્ટેન્ટ, એડવર્ટાઇઝમેન્ટ કે એપ વિશે ડિટેઇલ્ડ એનાલિસિસ પણ કરી શકાશે. ટેકનોલોજી ક્યાં જઇને અટકશે એવો વિચાર તમારા મનમાં આવે છે ને!
