સમગ્ર વિશ્વની જેમ ભારતમાં ડ્રોનનો ઉપયોગ ખાસ્સો વધ્યો છે. ખાસ કરીને ફોટોગ્રાફી માટે ડ્રોનનો ઉપયોગ વધતો જાય છે. મૂવી અને ટીવી સિરિયલ્સના શૂટિંગ્સ તથા વેડિંગ જેવાં ફંકશનના શૂટિંગમાં પણ ડ્રોનનો ઉપયોગ સામાન્ય બની ગયો છે.
એ સિવાય સલામતી સંસ્થાઓ રથયાત્રા કે અન્ય સંવેદનશીલ પ્રસંગોએ સલામતી વ્યવસ્થા જાળવવા માટે ડ્રોનનો ઉપયોગ કરવા લાગી છે.
ભારત સરકાર લાંબા સમયથી ડ્રોનના ઉપયોગ સંબંધિત નીતિ નિયમો ઘડવા પર કામ કરી રહી છે. નાગરિક ઉડ્ડયન મંત્રાલય તથા સંરક્ષણ અને ગૃહ મંત્રાલય આ નિયમો પર કામ કરી રહ્યા છે. હાલની એરિયલ ફોટોગ્રાફી પોલિસી મુજબ ડિરેકટરેટ જનરલ ઓફ સિવિલ એવિએશન (ડીજીસીએ)ની મંજૂરી લીધા બાદ ડ્રોનની મદદથી એરિયલ ફોટોગ્રાફી કરી શકાય છે. પરંતુ હાલમાં આવા ફૂટેજને રેકોર્ડ માટે સ્ટોર કરી રાખવું ફરજિયાત નથી.
નવા નિયમો અનુસાર ડ્રોનથી કેપ્ચર કરેલ ફૂટેજ લાંબા સમય માટે સ્ટોર કરી રાખવું પડશે અને તેનું તપાસ સંસ્થાઓ ગમે ત્યારે પરીક્ષણ કરી શકશે.
