આજનું ઇન્ટરનેટ જે પાયા પર ઊભું છે તે આર્પાનેટમાં અમેરિકાની ઉટાહ યુનિવર્સિટી ચોથા નોડ તરીકે જોડાઈ. આર્પાનેટમાં શરૂઆતમાં પ્રયોગના ધોરણે ફક્ત ચાર નોડ જોડવાનું આયોજન હતું, એ કામ પૂરું થતાં આર્પાનેટનો પ્રયોગ સફળતાપૂર્વક શરૂ થયો.

આજના દિવસે ડગલસ એન્જલબર્ટ નામના સંશોધક અને તેમની ટીમે કેટલીક નવી ટેકનોલોજીનો ડેમો રજૂ કર્યો. એ જમાનામાં તેમણે હાઇપર ટેકસ્ટ અને વીડિયો કોન્ફરન્સિંગ જેવી નવી શોધ રજૂ કરી હતી પણ તેમને જગવિખ્યાત બનાવ્યા અન્ય એક શોધે. આ શોધ હતી કમ્પ્યૂટરનું માઉસ!

૨૦મી સદી પૂરી થવા આવી હતી ત્યારે આવી રહેલી ૨૧મી સદીએ માત્ર ટેકનોલોજીની દૃષ્ટિએ નહીં પરંતુ બીજી ઘણી રીતે લોકોમાં ખાસ્સી ઉત્સુકતા અને આશાઓ જગાવી હતી. જોકે આશાઓની સાથે આશંકા પણ હતી.

ખાસ કરીને ‘વાયટુકે (યર ટુ થાઉઝન્ડ)’ બાબતે લોકોમાં ખાસ ચિંતા હતી. એ સમયે લોકોને ખાસ એ ચિંતા હતી કે દુનિયાભરનાં કમ્પ્યૂટર વર્ષ ૨૦૦૦ને ઓળખી જ શકશે નહીં. કારણ એ હતું કે ઘણા કમ્પ્યૂટર પ્રોગ્રામમાં વર્ષને ચાર અંકને બદલે માત્ર છેલ્લા બે અંકથી દર્શાવવામાં આવ્યું હતું. આ કારણે કમ્પ્યૂટરને વર્ષ ૧૯૦૦ અને વર્ષ ૨૦૦૦ વચ્ચેના તફાવતની ખબર ન પડે એવી શક્યતા હતી.

વર્ષ ૨૦૦૦ના આગમન સુધીમાં કમ્પ્યૂટર આપણા જીવન પર ઠીક ઠીક હાવી થઈ ગયાં હતાં એટલે કમ્પ્યૂટર પ્રોગ્રામ વર્ષ ૨૦૦૦ના આંકને ઓળખી ન શકે તો આખી દુનિયામાં ખાસ્સી અંધાધૂંધી વ્યાપે તેવી શક્યતા હતી. જોકે વેલકમ ૨૦૦૦ કહેવાની ઘડી આવી પહોંચી ત્યાં સુધીમાં લગભગ આખી દુનિયાએ આ તકલીફનું સમાધાન શોધી લીધું હતું અને દુનિયાની સાથોસાથ કમ્પ્યૂટર પણ સહેલાઇથી ૨૧મી સદીમાં પ્રવેશ કરી ગયાં.