એક્સેલની જેમ, ગૂગલ શીટ્સમાં કામ કરતી વખતે ક્યારેક એવું બનતું હશે કે તમારે રો કે કોલમનું સ્થાન બદલવાની જરૂર ઊભી થાય. માની લો કે આઠમી રોમાંનો ડેટા પાંચમી રોના ક્રમે લાવવાનો થયો.
એમ કરવા માટે, સામાન્ય રીતે આપણે ચોથી રોની નીચે અને પાંચમી રોની ઉપર એક નવી ખાલી રો ઉમેરીએ, પછી આઠમી રો સિલેક્ટ કરી, તેને ત્યાંથી કટ કરીએ અને પેલી નવી ઉમેરેલી રો સિલેક્ટ કરી, તેમાં પેસ્ટ કરીએ. થોડો ટૂંકો રસ્તો રોને કટ કરી, નવી જગ્યાએ પેસ્ટ કરવાનો છે.
ગૂગલ શીટ્સ હજી વધુ સહેલો રસ્તો આપે છે! આપણે જોઈતી રો સિલેક્ટ કરીએ એટલે રોનો નંબર બતાવતી કોલમમાં કર્સરના સ્થાને હેન્ડ જોવા મળે અને આપણે રોને ડ્રેગ કરીને ઇચ્છીએ ત્યાં લઈ જઈ શકીએ! તમે તમારી કંપનીનો સેલ્સ રિપોર્ટ બનાવી રહ્યા હો કે કોઈ વેબસાઇટનો સાઇટમેપ બનાવી રહ્યા ત્યારે રોને ડ્રેગ-ડ્રોપ કરવાની સગવડ બહુ કામ લાગશે. એક્સેલમાં પણ આવી સગવડ છે, પણ તેમાં વર્ઝન મુજબ થોડી ગૂંચવણ થઈ શકે છે.
