ગૂગલ કંપની દર વર્ષે એન્ડ્રોઇડનું નવું વર્ઝન લોન્ચ કરતી રહે છે. આ વર્ષે ગૂગલે એન્ડ્રોઇડના ૧૧મા વર્ઝનની જરા વહેલી જાહેરાત કરી છે.
સામાન્ય રીતે ગૂગલના ડેવલપર્સની આઇઓ ઇવેન્ટમાં તેની જાહેરાત થતી હોય છે પરંતુ આ વર્ષે ફેબ્રુઆરીમાં જ તેની જાહેરાત થઈ ગઈ છે અને ડેવલપર્સ માટે એન્ડ્રોઇડના ૧૧મા વર્ઝનનું પ્રારંભિક પ્રીવ્યૂ વર્ઝન લોન્ચ કરી દેવામાં આવ્યું છે. આપણા હાથમાંના હાઇએન્ડ કે બિલકુલ નવા સ્માર્ટફોનમાં આ વર્ઝન આવતાં હજી ઘણો સમય લાગશે.
નવા વર્ઝનમાં વિવિધ એપ્સને કેમેરા અને માઇક્રોફોનની કામચલાઉ એક્સેસ આપવાનો વિકલ્પ મળશે તેમજ ઓપરેટિંગ સિસ્ટમમાં જ સ્ક્રીન રેકોર્ડિંગની સુવિધા આવરી લેવામાં આવશે. જેમ ફેસબુક મેસેન્જરમાં સ્ક્રીન પર બબલ્સ સ્વરૂપે ચેટહેડ જોવા મળે છે, તેમ એન્ડ્રોઇડના ૧૧મા વર્ઝનમાં નોટિફિકેશન્સનાં બબલ્સ જોવા મળશે. આ વર્ઝનમાં ફાઇવજી કનેક્ટિવિટીને પણ ધ્યાને લેવામાં આવી છે.
