એન્ડ્રોઇડ ફોનની ટેક્નોલોજીમાં જરા વધુ ઊંડા ઊતરતા લોકોને જુદા જુદાં ફોનનાં પરફોર્મન્સ તપાસવાનો અને સરખાવવવાનો શોખ હોય છે. આ કામમાં, ‘બેન્ચમાર્ક એપ’ તરીકે ઓળખાતી એપ્સ તેમને ઉપયોગી થાય છે. અત્યાર સુધી એનટુટુ (AnTuTu) નામની બેન્ચમાર્ક એપ ખાસ્સી લોકપ્રિય હતી. તકલીફ એ થઈ કે આ એપ ચીનની ચિત્તાહ મોબાઈલ નામની એક કંપનીની છે (એક સમયે બહુ લોકપ્રિય થયેલી ‘ક્લિન માસ્ટર‘ એપ યાદ છે?).
આ કંપની વિવિધ કારણોસર વિવાદાસ્પદ છે અને ગૂગલે તેની મોટા ભાગની એપ્સની જેમ એનટુટુ એપ પણ પ્લે સ્ટોરમાંથી દૂર કરી છે. હવે મોટા ભાગના કિસ્સામાં બને છે તેમ એનટુટુ જેવું જ નામ ધરાવતી સંખ્યાબંધ એપ પ્લે સ્ટોરમાં ફૂટી નીકળી છે, જે તેના યૂઝરનો ડેટા તફડાવી શકે છે. બેન્ચમાર્ક એપ ફોનના મોટા ભાગના રિસોર્સિસનો ઉપયોગ કરી શકતી હોય છે.
