તમારે કોઈ દુકાન, રેસ્ટોરાં કે ઓફિસે જવાનું હોય અને લોકડાઉન-અનલોકની ગૂંચવણમાં, એ જગ્યા અત્યારે ખુલ્લી હશે કે નહીં એની મૂંઝવણ થાય છે?
એ જગ્યાનો ફોન નંબર હોય તો સીધો ફોન કરીને પૂછી શકાય, બીજો એક ઉપાય ગૂગલને પૂછવાનો છે. એમાં પણ, સીધી મેપ્સ એપ ઓપન કરીને તેમાં એ જગ્યા સર્ચ કરશો તો મોટા ભાગે તેનું લિસ્ટિંગ મેપ્સમાં હશે જ અને તેમાં અત્યારે એ જગ્યા ખુલ્લી છે કે નહીં અને સાંજે ક્યારે બંધ થશે એ જાણી શકાશે.
કોરોનાની અસરથી, એ જગ્યા કામચલાઉ બંધ હોય તો એ પણ જાણી શકાશે. હા, એ બિઝનેસ પોતાના કામકાજના કલાકો અપટેડ કરે તો એ જાણી શકાશે, તેમ જ અન્ય લોકો તેમની જાણીકારી મુજબ ફેરફાર જણાવે (જેમ કે કોઈ બિઝનેસ હવે તદ્દન બંધ થઈ ગયેલ હોય તો તેમ), તો એ પણ મેપ્સમાં જોઈ શકાશે.
ડિસેમ્બર ૨૦૧૬ના અંકમાં વાત કરી હતી તેમ, ગૂગલ મેપ્સમાં ‘પોપ્યુલર ટાઇમ્સ’ નામની સુવિધા છે, જેની મદદથી, જે તે જાણીતા સ્થળે અઠવાડિયા દરમિયાન અને આ ઘડીએ કેટલી ભીડ હોય છે કે અત્યારે છે એ પણ જાણી શકાશે.
