વોટ્સએપનું સ્ટેટસ ફીચર ધીમે ધીમે વધુ ને વધુ લોકપ્રિય બનતું જાય છે. આ ફીચરનો લાભ લઈને કોઈ પણ વ્યક્તિ પોતાનું સ્ટેટસ તેના કોન્ટેક્ટસના તમામ લોકોને એક સાથે બતાવી શકે છે, જે ૨૪ કલાક માટે એક્ટિવ રહે છે.
અલબત્ત આ સ્ટેટસ ‘છેલ્લા તે પહેલા’ના નિશ્ચિત ક્રમમાં જ બતાવવામાં આવે છે. એટલે કે જો તમારા કોન્ટેક્ટસ લિસ્ટમાં અસંખ્ય કોન્ટેક્ટસ હોય અને તેમાંથી કોઈ ચોક્કસ વ્યક્તિના સ્ટેટસ જોવામાં તમને વધુ રસ હોય તો ત્યાં સુધી પહોંચવા તમારે ખાસ્સી કસરત કરવી પડે.
હવે વોટ્સએપ કંપની આ ખામી સુધારી રહી છે. થોડા સમયમાં આપણને એવી સુવિધા મળશે કે આપણે સ્ટેટસ અપડેટ્સ સંબંધિત વિવિધ પસંદગી સેટ કરી શકીશું એટલે કે ધારો કે તમને ‘સાયબરસફર’નું ડેઇલી સ્ટેટસ જોવામાં વધુ રસ હોય તો તમે એવું સેટિંગ કરી શકશો કે સ્ટેટસ ટેબમાં તમને ‘સાયબરસફર’નું સ્ટેટસ પહેલાં જોવા મળે, પછી ભલે તમારા બીજા કોઈ કોન્ટેક્ટ્સે ‘સાયબરસફર’ પછી પોતાનું સ્ટેટસ મૂક્યું હોય.
