ભારત સરકારના ડિપાર્ટમેન્ટ ઓફ ટેલિકોમ (ડીઓટી)એ ભારતમાં ફોનની ચોરી અટકાવવા તથા નકલી સેલફોનનું દૂષણ ડામવા માટે એક પ્રોજેક્ટ તૈયાર કર્યો છે. ‘સેન્ટ્રલ ઇક્વિપમેન્ટ આઇડેન્ટિટી રજિસ્ટર’ નામનો આ પ્રોજેક્ટ સેન્ટર ફોર ડેવલપમેન્ટ ઓફ ટેલિમેટિક્સ દ્વારા તૈયાર કરવામાં આવ્યો છે.આ સિસ્ટમ ઓગસ્ટ ૨૦૧૯માં લોન્ચ થઇ જવાની શક્યતા છે. તેની મદદથી સમગ્ર ભારતમાં ચોરાયેલા મોબાઇલ ફોન ટ્રેક કરી શકાશે. જો આવા ફોનનું સિમકાર્ડ બદલી નાખવામાં આવ્યું હશે તો પણ ફોનને ટ્રેક કરી શકાશે.
આ સિસ્ટમમાં દેશભરના તમામ મોબાઇલ ઓપરેટર્સના આઇએમઇઆઇ ડેટાબેઝને એકમેક સાથે સાંકળવામાં આવશે. જો કોઈ વ્યક્તિ પોતાનો ફોન ચોરાયો કે ખોવાયો હોવાની મોબાઇલ કંપનીને જાણ કરશે તો આ નવી સિસ્ટમની મદદથી એ ફોન પરની તમામ સર્વિસ બંધ કરી શકાશે અને એ ફોનને બ્લેકલિસ્ટ કરી શકાશે. પરિણામે તેનો ઉપયોગ ફરી શરૂ થશે તો સિસ્ટમને તેની જાણ થઈ જશે.
