ભારતમાં વધુ એક યુનિફાઇડ પેમેન્ટ્સ ઇન્ટરફેસ (યુપીઆઈ) આધારિત પેમેન્ટ એપ લોન્ચ થઈ છે. ચાઇનીઝ મોબાઇલ કંપની ઝાયોમીએ ‘એમઆઇ પે’ નામે આ સર્વિસ લોન્ચ કરી છે.

કંપનીએ ભારપૂર્વક કહ્યું છે કે તેણે પેમેન્ટ એપનો ડેટા ભારતમાં સ્ટોર કરવાની જરૂરિયાતનું પાલન કર્યું છે અને એમઆઇ પે એપને નેશનલ પેમેન્ટ્સ કોર્પોરેશન ઓફ ઇન્ડિયાની મંજૂરી મળી છે.

એમઆઇ પેમાં પેમેન્ટ્સ સર્વિસ પ્રોવાઇડર તરીકે આઇસીઆઇસીઆઈ બેન્ક કામ કરશે. યુપીઆઈ ઉપરાંત ડેબિટ કાર્ડ, ક્રેડિટ કાર્ડ અને ઇન્ટરનેટ બેન્કિંગથી પણ પેમેન્ટ થઈ શકશે.

ભારતમાં યુપીઆઈ આધારિત ઓનલાઇન પેમેન્ટ સારી એવી ગતિ પકડી રહ્યું છે. વિવિધ બેન્ક્સની ભીમ એપ્સ ઉપરાંત ગૂગલ પે, પેટીએમ, ફોન પે, મોબિક્વિક, હાઇક વગેરેમાં યુપીઆઇનો ઉપયોગ કરી શકાય છે.

ચીનમાં જબરદસ્ત સફળ વીચેટ પણ ભારતમાં યુપીઆઈ આધારિત સર્વિસ લોન્ચ કરે તેવી શક્યતા છે. એ સિવાય, ટૂંક

સમયમાં જિઓ મની અને વોટ્સએપમાં પણ યુપીઆઈ આવી જતાં ઓનલાઇન લેવડદેવડ ઘણી વધુ સહેલી બની જશે.