જ્યારે આપણે એક્સેલમાં કોઈ કોરી સ્પ્રેડશીટ ઓપન કરીએ ત્યારે તેમાં દરેક સેલની ઊંચાઈ અને પહોળાઈ નિશ્ચિત હોય છે. પછી તેમાં ટેક્સ્ટ કે નંબર્સ ઉમેરીએ એ મુજબ રોની ઊંચાઈ વધે અને કોલમની પહોળાઈ વધે.
જો તમે કોલમની પહોળાઈ નિશ્ચિત રાખવા માગતા હો પણ અમુક સેલમાં કોલમની પહોળાઈ કરતાં વધુ પ્રમાણમાં ટેક્સ્ટ હોય તો મથાળાની રીબનમાં હોમમાં એલાઇન્ટમેન્ટ ટેબમાં ‘રેપ ટેક્સ્ટ’નો વિકલ્પ મળે છે. તેને ક્લિક કરતાં કોલમની પહોળાઈ નિશ્ચિત રહે છે પણ રોની ઊંચાઈ વધે છે અને આખી ટેકસ્ટ એકથી વધુ લાઇનમાં ગોઠવાય છે.
જો આપણે કોલમની પહોળાઈ વધારીએ કે ઘટાડીએ તો સેલમાંની ટેકસ્ટની જરૂર મુજબ રોની ઊંચાઈ વધે કે ઘટે છે. હવે જો આપણે કોઈ કોલમની પહોળાઈ તેમાંના કોઈ પણ સેલમાંની સૌથી લાંબી ટેકસ્ટ જેટલી પહોળી કરવા ઇચ્છતા હોઇએ, જેથી સેલમાંની આખી ટેકસ્ટ એક જ લાઇનમાં દેખાય તો એ માટે એક કે વધુ કોલમ સિલેક્ટ કરો. હવે સિલેક્ટ કરેલી કોલમના મથાળાના નામની જમણી બાજુની લીટી ડબલ ક્લિક કરો. આથી કોલમ તેમાંની સૌથી લાંબી ટેકસ્ટ જેટલી પહોળી થઈ જશે. એ જ રીતે જુદી જુદી રોની ઊંચાઈ વધારી-ઘટાડી શકાશે.
