જો તમે આઇફોનમાં જીમેઇલ એપનો ઉપયોગ કરતા હો તો તમારે માટે ખુશખબર છે.
એન્ડ્રોઇડ યૂઝર્સને લાંબા સમયથી મળતી સ્વાઇપ જેસ્ચર્સને કસ્ટમાઇઝ કરવાની સુવિધા હવે આઇફોન યૂઝર્સને પણ મળશે.
અત્યાર સુધી આઇફોનમાં જીમેઇલ એપમાં તમે ઇમેઇલને ડાબી કે જમણી તરફ સ્વાઇપ કરો તો ઇમેઇલ ડીલિટ થતો હતો. એ સિવાય બીજી કોઈ રીતે સ્વાઇપ એકશનને કસ્ટમાઇઝ કરી શકાતી નહોતી.
જ્યારે એન્ડ્રોઇડમાં જીમેઇલ એપના સેટિંગ્સમાં જનરલ સેટિંગ્સમાં સ્વાઇપ એકશન્સમાં જઇને, મેઇલ ડાબે કે જમણે સ્વાઇપ કરવાથી તેને અનરીડ તરીકે માર્ક કરી શકાય, ડીલિટ કરી શકાય, આર્કાઇવ કરી શકાય, મૂવ કરી શકાય કે સ્નૂઝ કરી શકાય છે.
આ બધા જ વિકલ્પો હવે આઇફોનની જીમેઇલ એપમાં પણ મળવા લાગશે. એ ઉપરાંત આઇફોનમાં જીમેઇલ નોટિફિકેશનને લાંબો સમય પ્રેસ કરીને મેઇલને ફાઇલ કરવા સંબંધિત વિવિધ વિકલ્પો પણ મેળવી શકાશે.