ફેસબુક પર તમે જુદા જુદા મિત્રો તરફથી અવનવી મજાની ઇમેજિસ જોઇને દિવસ આખાનો કંટાળો કે ઓફિસનો થાક દૂર કરતા હશો.

આવું કંઈ ગમતું મળી જાય તો મિત્રો સાથે ગમતાનો ગુલાલ કરવાનું મન થાય અને તમે તેને ફોરવર્ડ કરી શકો.

અલબત્ત આ બધું પહેલાં જોવા મળે, પછી દિલને સ્પર્શે અને પછી શેર કરવામાં આવે. આખી વાતમાં જરા વધુ રોમાંચ ત્યારે ઉમેરાય જ્યારે આપણને ખબર જ ન હોય કે આપણે કઈ ઇમેજ શેર કરી રહ્યા છીએ (અલબત્ત એટલે જ આખી વાત થોડી જોખમી પણ બને છે).

ફેસબુક મેસેન્જરમાં આવું થઈ શકે છે. તમારે કરવાનું ફક્ત એટલું છે કે ફેસબુક મેસેન્જર એપ ઓપન કરો, તમારા કોઈ પણ મિત્ર કે ગ્રૂપ સાથેની ચેટ બોક્સ ઓપન કરો અને મેસેજમાં માત્ર આટલું લખો: @dailycute

આટલું લખીને મેસેજ સેન્ડ કરીને થોડી સેકન્ડ રાહ જોશો તો એટલે તમને અને તમારા મિત્રને એક સાથે નાનાં, ટબૂકડાં, મજાના ગલૂડિયાં કે બિલાડીનાં બચ્ચાંની કોઈ ક્યૂટ ઇમેજ જોવા મળશે.

આ ઇમેજને ક્લિક કરીને આપણે મૂળ પેજ પર જઇ શકીએ છીએ. આગળ કહ્યું તેમ કઈ ઇમેજ શેર કરવામાં આવશે તેની આપણને પહેલાં જાણ ન થતી હોવાથી માત્ર નજીકના મિત્રો સાથે જ આ સુવિધાનો લાભ લેવા જેવો છે.