‘સાયબરસફર’માં આપણે વારંવાર વાત કરી છે કે જુદી જુદી સાઇટ્સ કે એપ્સમાં ઉપલબ્ધ સોશિયલ સાઇન-ઇનની સગવડ બેધારી તલવાર છે.
મોટા ભાગની સાઇટ્સ/એપ્સમાં આપણે કાં તો નવું યૂઝરનેમ અથવા પોતાનું ઈ-મેઇલ એડ્રેસ નક્કી કરી, એ સર્વિસ માટે કોઈ નવો જ પાસવર્ડ નક્કી કરીને પોતાનું એકાઉન્ટ ખોલાવી શકીએ છીએ. એટલી ઝંઝટ ન કરવી હોય, વધુ એક પાસવર્ડ ન યાદ રાખવો હોય તો આ સાઇટ્સ પર ગૂગલ, ફેસબુક, ટવીટર વગેરેના આપણા યૂઝરનેમ-પાસવર્ડની મદદથી આપણે લોગ-ઇન થઈ શકીએ છીએ. આ ‘સોશિયલ લોગ-ઇન’ થયું. આને આપણે જે તે એપ સાથે ગૂગલ/ફેસબુકના ‘એકાઉન્ટને કનેક્ટ કર્યું’ એમ પણ કહેવાય.
આવું લોગ-ઇન સગવડભર્યું છે, પણ તેના ઘણા ગેરફાયદા પણ છે, એટલે હવે સોશિયલ લોગ-ઇન બહુ હિતાવહ રહ્યું નથી. એ જ કારણે આ પહેલાં, તમે કઈ કઈ સાઇટ્સ પર આ રીતે સોશિયલ લોગ-ઇન કર્યું છે એ તપાસવું જોઈએ.
તમારા ગૂગલ એકાઉન્ટ સાથે આવી કઈ કઈ થર્ડ પાર્ટી એપ્સ તમે પોતે કનેક્ટ કરી છે (અને હવે ભૂલી ગયા છો) એ તપાસવા માટે એન્ડ્રોઇડમાં, સેટિંગ્સમાં, ગૂગલમાં જાઓ. તેમાં ‘એપ્સ કનેક્ટેડ’નો વિકલ્પ શોધી કાઢો.
અહીં તમે કનેક્ટ કરેલી એપ્સની યાદી જોવા મળશે. જે એપનો હવે ઉપયોગ ન કરતા હો, તેને ક્લિક કરી, તેને ડિસકનેક્ટ કરી દો.
તમે myaccount.google.comલોગ-ઇન થઈ, તેમાં Third Parts apps with account access શોધીને ત્યાં પણ આ કામ કરી શકો છો.
