જીએસટી આવ્યા પછી, જો આપણે જીએસટી નંબર ધરાવતા હોઇએ તો આપણે જે જે જગ્યાએ જીએસટી ચૂકવ્યો હોય તેની રસીદો સાચવવાની ઝંઝટ વધી ગઈ છે. કારણ કે આપણે ચૂકવેલો જીએસટી આપણા જીએસટી રીટર્નમાં બાદ મેળવવાનો હોય છે. તમે જીએસટી નંબર ન ધરાવતા હો તો પણ ઘરના સામાન્ય હિસાબ કિતાબ જાળવવા માટે બિલની રસીદો સાચવી રાખવી જરૂરી હોય છે. ઘણા લોકો આ કામને પણ પેપરલેસ બનાવવા માટે રસીદનો ફોટો પાડી લેતા હોય છે. આમ તો આ માટે કેમસ્કેનર ઘણી સારી એપ છે કારણ કે એ ડોક્યુમેન્ટનો ફોટોગ્રાફ લઇને તેને આપોઆપ ક્રોપ પણ કરે છે અને તેની સ્પષ્ટતા ઝેરોક્ષ જેવી કરી આપે છે.
અલબત્ત કેમ સ્કેનરમાં ડોક્યુમેન્ટ સ્કેન કર્યા પછી તેને ગૂગલ ફોટોઝ કે અન્ય કોઈ ક્લાઉડ સ્ટોરેજ સર્વિસમાં લઈ જવાની ઝંઝટ રહે છે.
હવે તેનો ઉપાય ગૂગલ ફોટોઝમાં જ મળશે (ઘણા લોકોને મળવા લાગ્યો છે). હવે તમે તમારા ફોનમાં ગૂગલ ફોટોઝ એપ હોય અને કોઈ રસીદનો ફોટોગ્રાફ લો તો ફોટોઝ એપમાં તેને ઓપન કરતાં તેને ઓટોમેટિકલી ક્રોપ અને એડજસ્ટ કરવાનું એક બટન જોવા મળશે. તેને ક્લિક કરતાં ડોક્યુમેન્ટની આજુબાજુનો નકામો ભાગ ક્રોપ થશે અને રસીદનો ફોટો આડો હશે તો ઊભો પણ થઈ જશે.
અલબત્ત ફોટોઝમાં ડોક્યુમેન્ટની ક્લેરિટી હજી કેમ સ્કેનર જેટલું સારું પરિણામ આપતી નથી.