તમે માઇક્રોસોફ્ટ એક્સેલ અને ગૂગલ શીટ્સ પ્રોગ્રામની સરખામણી કરી છે? એક્સેલ પાર વગરના ફીચર્સ ધરાવતો પ્રોગ્રામ છે, પરંતુ ગૂગલ શીટ્સ પ્રોગ્રામ પણ ધીમે ધીમે તેની ઘણી નજીક પહોંચી રહ્યો છે.
જો તમે એક્સેલના પાવરયૂઝર હો તો જુદા જુદા લોકો સાથે શેરિંગ માટે કે ફાઇલ્સને ગમે તે ડિવાઇસમાંથી એક્સેસ કરવા ગૂગલ શીટ્સ અજમાવી રહ્યા હશો. બીજી તરફ જો તમને એક્સેલનો લાભ લેવામાં ગૂંચવણો થઈ રહી હોય તો શીટ્સની સરળતા તમને ગમશે.
અહીં આપણે ગૂગલ શીટ્સની એક મજાની ખૂબી ફટાફટ જાણી લઇએ. ઘણી વાર એવું બને કે આપણે એક સ્પ્રેડશીટમાં, ટેબલમાં ડેટા એન્ટર કરતી વખતે જે તે દિવસની તારીખ નાખવાની જરૂર પડે. એક્સેલની જેમ ગૂગલ શીટ્સમાં સેલમાં કર્સર મૂકીને Ctrl+; કી પ્રેસ કરતાં જે તે દિવસની તારીખ ઉમેરાઈ જાય છે.
એક ડગલું આગળ વધીને, અહીં તમે ‘ડેટ પીકર’ ઉમેરી શકો છો, જેથી સેલ પર ડબલ ક્લિક કરતાં આખા મહિનાનું ટચૂકડું કેલેન્ડર ઓપન થાય અને તમે કોઈ પણ તારીખ પસંદ કરી શકો.
એવું કરવા માટે તમે શીટના ટેબલમાં જે કોલમમાં માત્ર ડેટ્સ લખવા માગતા હો તેને સિલેક્ટ કરીને મથાળાના મેનૂમાં, ડેટામાં, ડેટા વેલિડેશન પસંદ કરો. અહીં ક્રાઇટેરિયામાં ડેટ પસંદ કરો અને સેટિંગ સેવ કરી લો. ડેટા વેલિડેટશનના બીજા વિકલ્પો પણ તપાસવા જેવા છે.
