રિલાયન્સ જિઓએ પોતાના યૂઝર્સને વીઓએલટીઇ પર ગ્રૂપ કોન્ફરન્સ કોલની સગવડ આપી છે. આ માટે પ્લે સ્ટોરમાં એક એપ ઉપલબ્ધ કરવામાં આવી છે.
માત્ર એન્ડ્રોઇડ પર અને માત્ર જિઓના સબસ્ક્રાઇબર્સ માટેની આ ‘જિઓ ગ્રૂપ ટોક’ એપની મદદથી એક સમયે એક સાથે ૧૦ લોકો એકબીજા સાથે વાતચીત કરી શકે તેવી સુવિધા છે.
અલબત્ત અત્યારે આ એપ ટ્રાયલ મોડમાં છે અને થોડા સમયમાં તેનું કમર્શિયલ વર્ઝન લોન્ચ થાય તેવી શક્યતા છે. આ એપમાં લેકચર મોડ પણ છે એટલે કે એક વ્યક્તિ બોલે અને બાકીના લોકો માત્ર તેને સાંભળી શકે તેવું તેમાં શક્ય છે.
આ એપની મદદથી કોન્ફરન્સ કોલ શેડ્યૂલ પણ કરી શકાશે તેમજ એક પછી એક યૂઝર એડ કરવાને બદલે એક સાથે તમામ ૧૦ લોકોને કોલ કરી શકાય તેવું પણ શક્ય બનશે.
અત્યારે આ એપમાં માત્ર વોઇસ ગ્રૂપ કોલિંગની સુવિધા છે. પરંતુ થોડા સમયમાં તેમાં વીડિયો કોલિંગ અને ચેટિંગ ફીચર પણ ઉમેરાઈ શકે છે.