છેલ્લાં એક દાયકાથી ૨.૫ અબજથી વધુ સાધનો સુધી પહોંચેલી એન્ડ્રોઇડ ઓપરેટિંગ સિસ્ટમના નામકરણમાં હવે ફેરફાર થઈ રહ્યો છે.
ગૂગલ દર વર્ષે પોતાની આ ઓપરેટિંગ સિસ્ટમનું અપડેટેડ વર્ઝન લોન્ચ કરે છે. અત્યાર સુધી ગૂગલે દરેક વર્ઝનને કોઈ ને કોઈ ડેઝર્ટ એટલે કે મીઠી વાનગીનું નામ આપવાની પરંપરા જાળવી છે. પરંતુ હવે એન્ડ્રોઇડના ૧૦માં વર્ઝનથી તેને માત્ર સંખ્યાથી ઓળખવામાં આવશે.
ગૂગલના જણાવ્યા અનુસાર ડેઝર્ટ કે આલ્ફાબેટ અનુસાર નામ આપવાને કારણે યૂઝર્સમાં ગૂંચવણ થાય છે ખાસ કરીને વિશ્વના જુદા જુદા ભાગોમાં જુદી જુદી ભાષા અને સંસ્કૃતિ હોવાને કારણે આ ગૂંચવણો રહે છે. આથી આખરે ગૂગલે માત્ર આંકડા આધારિત નામ આપવાનો નિર્ણય કર્યો છે.
