જુદી જુદી ઓનલાઇન કંપનીઝ વચ્ચે ગળાકાપ સ્પર્ધા ચાલી રહી છે ત્યારે વાસ્તવિક રીટેઇલ મોલ્સમાં પણ ટેકનોલોજી કામે લગાડવાની હરીફાઈ શરૂ થઈ છે. એમેઝોન કંપનીએ ‘એમેઝોન ગો’ નામે એવા રીટેઇલ સ્ટોર્સ શરૂ કર્યા છે.
લોકો સ્ટોરમાં પ્રવેશીને શેલ્ફ પરથી જુદી જુદી ચીજવસ્તુઓ ઉઠાવીને આરામથી સ્ટોરની બહાર નીકળી શકે છે, તેઓ સ્ટોર બહાર જઇ રહ્યા હોય ત્યારે વિવિધ સેન્સર્સથી ચીજવસ્તુઓ ઓટોમેટિક સ્કેન થાય અને તેની રકમ ગ્રાહકના કાર્ડમાંથી આપોઆપ ચૂકવાઈ જાય એવી વ્યવસ્થા છે (વધુ વિગતો માટે જુઓ ‘સાયબરસફર’નો ફેબ્રુઆરી ૨૦૧૭ અંક).
તેમનો સામનો કરવા માટે વોલમાર્ટ કંપનીએ તેના ૧૦૦૦થી વધુ સ્ટોર્સમાં આર્ટિફિશિયલ ઇન્ટેલિજન્સ કામે લગાડી છે. આ પદ્ધતિ મુજબ વોલમાર્ટના અત્યંત વિશાળ સ્ટોર્સમાં અલગ અલગ શેલ્ફ પરની ચીજવસ્તુઓનો સ્ટોક ઓછો થતો જાય તેમ તેમ સ્ટોર એડમિનિસ્ટ્રેશનને ત્યાં નવો સ્ટોક મૂકવાની જાણ થતી જાય છે. એ ઉપરાંત જો કોઈ ગ્રાહક ભૂલથી કોઈ ચીજ પેમેન્ટ માટે સ્કેન કરાવ્યા વિના સ્ટોરની બહાર નીકળે તો પણ એડમિનિસ્ટ્રેશનને તરત તેની જાણ થાય છે.
કંપનીના જણાવ્યા અનુસાર આ રીતે કમ્પ્યુટર વિઝનને કામે લગાડ્યા પછી સ્ટોર્સમાંથી ચોરીનું પ્રમાણ પણ ઘટવા લાગ્યું છે!
