આપણા જીવનનો એક અભિન્ન હિસ્સો બની ગયા છે અને તેના વિના લગભગ કોઈને એક ઘડી ચાલતુ નથી. પરંતુ સ્માર્ટફોનનું ચાર્જિંગ હજી પણ એક મોટી પળોજણનો વિષય છે. વિશ્વ આખાને આ એટલી મોટી સમસ્યા લાગે છે કે એક કંપનીએ તેનો કંઈક ઉપાય શોધ્યો અને તેને એ દિશામાં આગળ વધવા જરૂરી મંજૂરી મળી તો એ કંપનીના શેરના ભાવ રાતોરાત ત્રણ ગણા વધી ગયા!
અમેરિકાના એનર્જસ નામના એક સ્ટાર્ટઅપે નવા પ્રકારની વાયરલેસ ચાર્જિંગ સિસ્ટમ વિકસાવી છે અને અમેરિકાના ફેડરલ કમ્યુનિકેશન્સ કમિશને આ ‘પાવર એટ એ ડિસ્ટન્સ ચાર્જર’ને સર્ટિફાઇ પણ કરી દીધું છે. કંપનીએ ૨૦૧૮ના કન્ઝયુમર ઇલેકટ્રોનિક શોમાં તેની આ નવી સિસ્ટમ ડિસ્પ્લે પણ કરી.
અગાઉ એવી શક્યતાઓ જોવાઈ રહી હતી કે આ કંપની અને એપલ જોડાણ કરી લેશે જેથી માત્ર એપલના ડિવાઈસીસમાં આ નવી ચાર્જિંગ ક્રાંતિનો લાભ મળશે પરંતુ હવે એવું લાગે છે કે, આ કંપની સ્વતંત્ર રીતે આગળ વધશે અને કોઈ પણ પ્રકારના ડિવાઇસમાં તેનો લાભ મેળવી શકાશે.
આ ચાર્જિંગ સિસ્ટમ કેવી રીતે કામ કરે છે?
આ સિસ્ટમ એક પ્રકારે વાઇ-ફાઇની જેમ જ કામ કરે છે. તેના મુખ્ય ત્રણ પાસાં છે : ટ્રાન્સમીટર, રીસિવર અને સોફ્ટવેર.
આ આખી સિસ્ટમ વાઇ-ફાઇની જેમ રેડિયો ફ્રિકવન્સી પર ચાલે છે જેમાં ટ્રાન્સમીટર ઈલેક્ટ્રિસિટીને રેડિયો સિગ્નલમાં ફેરવી નાખે છે.
આ સિગ્નલ આ સિસ્ટમના રીસિવર ધરાવતા સ્માર્ટફોન, ટેબલેટ, ટીવી, લેપટોપ, કી-બોર્ડ, માઉસ, પ્લે સ્ટેશન, એલઇડી લાઇટ, હેડસેટ, ફિટનેસ બેન્ડ, કેમેરા વગેરે સાધનો ઝીલી શકે છે.
આ સાધનોમાંના ખાસ પ્રકારના રીસિવર તેને મળેલા રેડિયો સિગ્નલને ફરી પાવર સિગ્નલમાં ફેરવીને પોતાની બેટરી ચાર્જ કરે છે. આ આખી વ્યવસ્થા સ્માર્ટફોનમાંની એપ કે વેબ બેઝડ સોફ્ટવેરથી નિયંત્રિત કરી શકાય છે.
હાલમાં ૩ ફૂટ સુધીના અંતર માટે આ ટેકનોલોજીને માન્યતા મળી છે. તેનો ખાસ ફાયદો એ છે કે એક જ ચાર્જરથી ૩ ફૂટની મર્યાદામાં રહેલા એકથી વધુ સાધન એક સાથે ચાર્જ કરી શકાય છે. કંપનીએ ૧૫ ફૂટની મર્યાદામાં ચાર્જિંગ થઈ શકે એવી રીતે આ ટેકનોલોજીને વિસ્તારવાની જાહેરાત કરી દીધી છે.
