જૂની એસએમએસ સર્વિસમાં રિચ કમ્યુનિકેશન સર્વિસીઝ (આરસીએસ)ની સુવિધા ઉમેરાવાના કારણે, આપણી મિત્રો કે સ્વજનો સાથે સંપર્કમાં રહેવાની પદ્ધતિમાં કદાચ બહુ મોટાં પરિવર્તનો નહીં આવે કારણ કે એ બાબતે તો વોટ્સએપ કે ફેસબુક મેસેન્જર જેવી સર્વિસ ઘણી આગળ વધી ગઈ છે અને આપણને સૌને તે ઘણી માફક આવી ગઈ છે.
પરંતુ જુદી જુદી બિઝનેસ કંપની એસએમએસમાં આરસીએસની સુવિધાનો કેવી રીતે લાભ લઈ શકશે અને તેનો આપણને શો ફાયદો થશે તે જાણવા જેવું છે.
ફેસબુકે તેની મેસેન્જર સર્વિસમાં પણ ચેટબોટ સ્વરૂપે આવી સુવિધા ઉમેરી છે (જુઓ નવેમ્બર ૨૦૧૬નો અંક), પરંતુ તે મેસેન્જર પૂરતી મર્યાદિત હોવાથી હજી બહુ વેગ પકડી શકી નથી. એન્ડ્રોઇડમાં ગૂગલ આસિસ્ટન્ટમાં પણ આ પ્રકારની સર્વિસ ધીમે ધીમે ઉમેરાઈ રહી છે.
એસએમએસમાં શું શક્ય બનશે તેની ઝલક નીચેનાં બે ઉદાહરણમાં મળશે.
આ બંને ઉદાહરણ, નવા પ્રકારની એસએમએમ ટેક્નોલોજીથી બિઝનેસ કમ્પ્યુનિકેશન માટે કેવી નવી શક્યતાઓ ખૂલશે તેનો આછો અંદાજ મળે છે.
એ ખાસ નોંધવા જેવું છે કે જેમ અત્યારે જુદા જુદા બિઝનેસને વેબસાઇટ કે એપ ડેવલપ કરી આપતી કે સોશિયલ મીડિયા પર માર્કેટિંગ કરી આપતી સર્વિસનો જુવાળ આવ્યો છે, તેમ નજીકના ભવિષ્યમાં, જુદા જુદા પ્રકારના બિઝનેસને તેમની જરૂરિયાત અનુસાર એસએમએસમાં રિચ કમ્યુનિકેશન સર્વિસ ઉમેરી આપતી કંપનીની ડિમાન્ડ વધશે. એ જ રીતે, આ પ્રકારની સર્વિસ ડેવલપ કરી શકે તેવા ડેવલપર્સની ડિમાન્ડ પણ વધશે. વિવિધ ઓનલાઇન જોબ્સ પોર્ટલ પર આવી તકો હવે દેખાવા લાગી છે!
બેન્ક તરફથી નવા પ્રકારની એસએમએસ સર્વિસ
બેન્ક તરફથી તમને એક એસએમએસ આવશે અને પૂછવામાં આવશે કે બેન્ક તમારી કેવી રીતે મદદ કરી શકે છે? સાથોસાથ, બેલેન્સ, ટ્રાન્ઝેક્શન્સ અને સ્ટેટમેન્ટના ત્રણ વિકલ્પ આપેલા હશે.
તમે બેલેન્સ પર ક્લિક કરશો તો નવા એસએમએસમાં તમારું બેલેન્સ જણાવવામાં આવશે, સાથે બેન્કને કોલ કરવો, ટ્રાન્ઝેક્શન જાણવાં કે સ્ટેટમેન્ટ મેળવવું વગેરેના વિકલ્પો પણ મળશે.
ધારો કે તમે સ્ટેટમેન્ટ પર ક્લિક કરશો, તો બેન્ક તરફથી તમારા ખાતાનું આખા સ્ટેટમેન્ટની ઇમેજ નવા એસએમએસમાં મળી જશે!
ડેન્ટિસ્ટ તરફથી નવા પ્રકારની એસએમએસ સર્વિસ
તમારા ડેન્ટિસ્ટ એક એસએમએસથી યાદ અપાવશે કે કાલે બપોરે એક વાગ્યે તમારી એપોઇન્ટમેન્ટ છે. સાથે એપોઇન્ટમેન્ટનો સમય બદલવાનાં, કોલ કરવાનાં કે રસ્તો જાણવાનાં બટન હશે.
જૂની એપોઇન્ટમેન્ટનો સમય અનુકૂળ ન હોય તો તમે રી-શિડ્યુલ પર ક્લિક કરશો તો ડેન્ટિસ્ટ ક્લિનિક તરફથી હવે કયો સમય ઉપલબ્ધ છે તે બતાવતાં બટન મળશે.
તમે કોઈ નવો સમય પસંદ કરશો એટલે એ કન્ફર્મ થશે અને સાથોસાથ મેપ પર ક્લિનિકના એડ્રેસની લિંક અને નવી એપોઇન્ટમેન્ટ તમારા કેલેન્ડરમાં ઉમેરવાની સુવિધા પણ મળશે!