આજે સ્માર્ટફોન કે પીસી ધરાવતી, પણ ફેસબુકનો ઉપયોગ ન કરતી હોય એવી વ્યક્તિ મળવી મુશ્કેલ છે. ફેસબુકના પોતાના દાવા મુજબ, તેનું મિશન આખી દુનિયાના લોકોને એકમેકની નજીક લાવવાનું છે. પરંતુ આ મિશન પૂરું કરવાની ફેસબુકને એટલી ઉતાવળ છે કે તે પોતાના યૂઝર્સને લગભગ અંધારામાં રાખીને તેમના વિશેની વિગતો આખી દુનિયામાં ચોતરફ ફેલાવી રહી છે.
વાત ફેસબુકની હોય કે ગૂગલની, ઇન્ટરનેટની મોટી કંપનીઝ આપણા ડેટાનો કેવી રીતે ઉપયોગ કરે છે અને આપણે શું સાવધાની રાખવી એ વિશે ‘સાયબરસફર’માં સતત લખાતું રહ્યું છે. આ વખતે ફેસબુકમાં પ્રાઇવસી સંબંધિત સેટિંગ્સની હજી વધુ વિગતવાર માહિતી આવરી લીધી છે.
તેની સાથોસાથ જૂનો સ્માર્ટફોન એક્સચેન્જમાં આપતાં પહેલાં શું સાવચેતીઓ લેવી તે લેખ પણ અચૂક વાંચવા અને તેમાં આપેલી બાબતોની કાળજી લેવાની ભલામણ!
આ બધી સાવચેતીની વાતો વચ્ચે, ગૂગલ લેન્સની મજાની સગવડ તમને કંઈક રાહત આપશે. આ નવી સુવિધા આવનારા સમયમાં આપણી દુનિયાને ઘણી બધી રીતે બદલી નાખશે. અલબત્ત, આમાં પણ આપણા ડેટાનો ઉપયોગ તો સમજવો જ પડશે!
‘સાયબરસફર’માં વારંવાર કહેવામાં આવે છે તેમ, આજની સ્માર્ટ ટેક્નોલોજીની આડઅસર એવી લીટી છે, જેને આપણે ભૂંસીને નાની કરી શકીશું નહીં. તેથી આપણી સમજને વિસ્તારીને, આ આડઅસરોને ઓછી કરવી પડશે.
– હિમાંશુ
