આગળ શું વાંચશો?

• .jpg (Joint Photographic Experts Group)
• .psd (Adobe Photoshop)
• .png (Portable Network Graphics)
• .pdf (Portable document format)
• .gif (Graphics Interchange Format)
• .eps (Encapsulated PostScript file)

.jpg (Joint Photographic Experts Group)

આ પ્રકારની ફાઇલનો હાઇ ક્વોલિટી ફોટોગ્રાફી માટે ઉપયોગ થાય છે. ઇન્ટરનેટ પર તેનો ઓછા રિઝોલ્યુશનમાં ઉપયોગ થઈ શકે છે. આ પ્રકારની ઇમેજને મોટી કરવામાં આવે તો તેની ગુણવત્તા બગડે છે. ઉપરાંત આ પ્રકારની ફાઇલમાં બેકગ્રાઉન્ડનો કેટલોક ભાગ ટ્રાન્સપરન્ટ રાખી શકાતો નથી. પ્રિન્ટિંગ સમયે આખી ડિઝાઇન આ ફાઇલ સ્વરૂપે આપી શકાય, પણ બહુ સારું પરિણામ મળતું નથી.

.psd (Adobe Photoshop)

ફોટોગ્રાફ, ગ્રાફિક્સ અને વેબ ડિઝાઇનના એડિટિંગ માટે આ ફાઇલ ફોર્મેટ ઉપયોગી થાય છે. તેમાં માસ્ક, લેયર્સ, ટ્રાન્સપરન્સી, ટેક્સ્ટ, એકશન્સ, ફિલ્ટર્સ વગેરે ઇમેજ એડિટિંગના વિવિધ ફિચર્સનો પૂરો લાભ લઈ શકાય છે. જો કે આ પ્રકારની ફાઇલને પણ મોટી કરવા જતાં તેની ગુણવત્તા બગડી જાય છે.

.png (Portable Network Graphics)

આ પ્રકારની ફાઇલ ઇન્ટરનેટ પર ઇમેજની આપ-લે કરવા માટે વધુ ઉપયોગી છે. તેમાં બેકગ્રાઉન્ડનો કેટલોગ ભાગ ટ્રાન્સપરન્ટ રાખી શકાય છે. આ પ્રકારની ફાઇલને પણ મોટી કરવા જતાં તેની ગુણવત્તા બગડી જાય છે. સામાન્ય રીતે ઇન્ટરનેટ પર ટેક્સ્ટ કે ગ્રાફિક્સ દર્શાવવા માટે આ પ્રકારની ફાઇલ ઉપયોગી છે. પ્રિન્ટમાં આ પ્રકારની ફાઇલ સારું પરિણામ આપતી નથી.

.pdf (Portable document format)

ડોક્યુમેન્ટની મૂળ ડિઝાઇન કે ગુણવત્તામાં કોઈ ફેરફાર ન થાય એ રીતે ફાઇલને ઓનલાઇન ટ્રાન્સફર કરી શકાય છે. સંખ્યાબંધ પ્રિન્ટ પબ્લિકેશન્સ વિજ્ઞાપનો પીડીએફ સ્વરૂપે મેળવવાનું પસંદ કરે છે.

.gif (Graphics Interchange Format)

આ પ્રકારની ફાઇલ ઓનલાઇન ઉપયોગ માટે ઉપયોગી છે. તેમાં ઇમેજમાંના કલર્સની સંખ્યા ઘટીને ૨૫૬ થઇ જાય છે. તેથી ફાઇલ સાઇઝ ઘણી નાની થાય છે. ખાસ કરીને એનિમેશનમાં આ પ્રકારની ફાઇલનો ઉપયોગ થાય છે. .જિફ ફાઇલ ફોર્મેટ એ .પીએનજી ફોર્મેટ જેવું જ છે પરંતુ તેમાં ગુણવત્તા પીએનજી કરતાં નબળી હોય છે.

.eps (Encapsulated PostScript file)

આ પ્રકારના ફાઇલ ફોર્મેટનો લોગો અને ઇલસ્ટ્રેશનની વેકટર ફાઇલ તરીકે ઉપયોગ થઈ શકે છે. આ પ્રકારની ફાઇલને આપણે ઇચ્છીએ તેટલી મોટી કરી શકીએ છીએ. સાદી ટપાલ ટિકિટમાંથી બહુમાળી બિલ્ડિંગ જેટલી ઇમેજ સાઇઝ કરીએ તો પણ તેમાં ઇમેજ ક્વોલિટી બગડતી નથી! આ પ્રકારના ફોર્મેટમાં બેકગ્રાઉન્ડનો કેટલોક ભાગ ટ્રાન્સપરન્ટ રાખી શકાય છે. લાર્જ ફોર્મેટ પ્રિન્ટિંગ માટે આ આદર્શ ફાઇલ ફોર્મેટ છે.