કાંકરિયાની પાળે કે માઉન્ટ આબુના નખી તળાવની પાળે, બેકગ્રાઉન્ટમાં મજાનું સરોવર દેખાય એવી સેલ્ફી તો તમે લીધી હશે, પણ એ તળાવની જગ્યાએ ઘગધગતો, ખદબદતો લાવા હોય એવી કલ્પના કરી શકો છો? 

જીવંત, ઉકળતા જ્વાળામુખીની અંદરનું તાપમાન ૭૦૦થી ૧૨૫૦ ડીગ્રી સે. જેટલું હોઈ શકે છે, ઉનાળામાં ગરમીનો પારો ૪૫ ડીગ્રી સુધી પહોંચે ત્યાં આપણે ત્રાહીમામ પોકારી જઈ છીએ!

જ્યોફ મેક્લી અને ક્રિસ હોર્સ્લી નામના બે સાહસિકે આવી ‘સેલ્ફી’ લેવાની હિંમત કરી.

એ બંને ઓસ્ટ્રેલિયાના કાંઠાથી હજારેક માઇલ દૂર, દક્ષિણ પ્રશાંત મહાસાગરમાં વનુઆતુઆન નામના ૮૦ જેટલા ટાપુઓના એક ટચૂકડા દેશના પ્રવાસે ઉપડ્યા. આ ટાપુઓ પર રળિયામણા બીચ, ગાઢ લીલાંછમ જંગલોની સાથે નવ ઉકળતા જ્વાળામુખી પણ છે. ટાપુઓ પર ૭૦૦૦ જેટલા લોકોની વસતી પણ છે.

આ બંને સાહસિક પોતાની સાથે ગૂગલ સ્ટ્રીટ વ્યૂ ટ્રેકર પણ લઈ ગયા હતા. બંને જણા શરીરે દોરડાં બાંધીને અને ખભા પર સ્ટ્રીટ વ્યૂ ટ્રેકર ઊંચકીને ફૂટબોલના બે મેદાન જેવડા એક જ્વાળામુખીના મુખમાં ઊતર્યા અને વચ્ચોવચ, ખદબતતા લાવાની તદ્દન નજીક પહોંચીને ત્યાંની ૩૬૦ ડીગ્રી ઇમેજીસ કેપ્ચર કરી. આ ઇમેજીસ પરથી ગૂગલે જ્વાળામુખીનો ‘સ્ટ્રીટ’ વ્યૂ તૈયાર કર્યો. આપણી પૃથ્વી અંદરથી કેવી છે એ આટલું ‘નજીક’થી તમે ક્યારેય જોયું નહીં હોય.

આ સ્ટ્રીટ વ્યૂ જોવા માટે આ લિંક પર જાઓ : https://goo.gl/7zqtNE