ગૂગલે તેની જીમેઇલ અને ઇનબોક્સ એપમાં હમણાં એક એવી સુવિધા ઉમેરી છે જે તેને ખરેખર ઘણા સમય પહેલાં ઉમેરી દેવા જેવી હતી! અત્યાર સુધી આપણને કોઈ મેઇલમાં વેબપેજનુ એડ્રેસ આવ્યું હોય તો તે લિંક તરીકે કામ કરતું અને તેના પર ક્લિક કરતાં એ પેજ બ્રાઉઝરમાં ઓપન થતું હતું. પરંતુ આવી સગવડ એડ્રેસ કે ફોન નંબરમાં મળતી નહોતી.
કોઈ વ્યક્તિ આપણને ઇમેઇલમાં પોતાનો ફોન નંબર કે એડ્રેસ મોકલે અને આપણે તેમને એ નંબર પર કોલ કરવો હોય કે મેપ્સમાં તેમનું એડ્રેસ જોવું હોય તો ઈ-મેઇલમાંથી આ વિગતો કોપી કરીને જે તે એપમાં તેને પેસ્ટ કરવી પડતી હતી.
હવે આ કસરત કરવી પડશે નહીં. નવા અપડેટ અનુસાર આવી વિગતો પણ હવે લિન્ક સ્વરૂપે જોવા મળે છે. પરિણામે કોઈના એડ્રેસ પર ક્લિક કરતાં એ ગૂગલ મેપમાં ઓપન થાય છે અને ફોન નંબર પર ક્લિક કરતાં ડાયલર એપ ઓપન થઈ જાય છે.
