‘સાયબરસફર’ વાંચવાની હવે રીતસર આદત પડી ગઈ છે. દરેક લેખ ખરેખર ખૂબ સરસ અને ઉપયોગી હોય છે. એક ખાસ સૂચન છે. હવે કમ્પ્યુટર્સનું સ્થાન સ્માર્ટફોને લઈ લીધું છે.
સૌ હવે સ્માર્ટફોનનો કમ્પ્યુટર તરીકે ઉપયોગ કરવા લાગ્યા છે અને સ્માર્ટફોન માટે અસંખ્ય પ્રકારની એપ્સ હોય છે. ‘સાયબરસફર’માં સ્માર્ટફોનની એપ્સનો એક સ્પેશિયલ આર્ટિકલ હંમેશા આપો તો સૌને ખૂબ ઉપયોગી થશે. ડિજિટ અને માય મોબાઇલ જેવાં મેગેઝિનમાં દરેક અંકમાં એપ્સ વિશે ખાસ લેખ હોય છે. આવા લેખ તથા ગેમિંગ એપ્સ વિશેના લેખો પણ આપવા વિનંતી.
– કેતન કૂકડિયા, થાણે, મહારાષ્ટ્ર
ગુજરાતી ભાષામાં આ પ્રકારનું મેગેઝિન જોઈ-વાંચીને ખરેખર આનંદ થાય છે. મોટાં શહેરોની વાત જુદી હશે, પણ નાનાં ગામની શાળાઓમાં કમ્પ્યુટર આવી ગયાં છે છતાં એનો બહુ જ ઓછો ઉપયોગ થાય છે. ‘સાયબરસફર’ એવું મેગેઝિન છે જે શિક્ષક માટે શિક્ષકની ગરજ સારે છે!
– દિનેશ મોરપરિયા, દયાપર, કચ્છ
ફેબ્રુઆરી, ૨૦૧૭ અંકમાં ‘જાતે શીખો ૩ડી ડિઝાઇનિંગ’ લેખ વાંચવાની મજા પડી. અમારું કમ્પ્યુટર ધીમું હોય કે નેટ કનેક્શન ધીમું હશે, એટલે ટિંકરકેડના ઉપયોગમાં થોડી મુશ્કેલી આવી રહી છે, પણ ૩ડી ડિઝાઇનિંગ આટલું સરળ હોઈ શકે છે એ પહેલી જ વાર જાણ્યું. આવા લેખ આપતા રહેશો.
– દીપિકા જાની, કપડવંજ
