આઇટી ક્ષેત્રમાં અત્યંત તેજ ગતિએ વિકસી રહેલ ટેકનોલોજી અને તેના પ્રતાપે વધી રહેલા ઓટોમેશનને કારણે લોકોની નોકરી જવાનો ખતરો હવે સતત વધી રહ્યો છે.
હમણાં પ્રકાશિત એક અહેવાલ મુજબ ઇન્ફોસિસ કંપનીએ વર્ષ ૨૦૧૬માં ૯૦૦૦ જેટલા કર્મચારીઓને ‘રીલિઝ’ કર્યા છે. કંપનીની સ્પષ્ટતા મુજબ આ કર્મચારીઓને સાવ છૂટા કરવામાં આવ્યા નથી પણ અન્ય ડિપાર્ટમેન્ટમાં ખસેડવામાં આવ્યા છે. એક અંદાજ મુજબ કંપની દર ત્રણ મહિને ૨૦૦૦ જેટલા કર્મચારીઓને આ રીતે રીલિઝ કરી રહી છે.
બીજી તરફ એચડીએફસી બેન્ક તેની બ્રાન્ચમાં કસ્ટમર સર્વિસ માટે રોબોટને કામે લગાડનારી પહેલી ભારતીય બેન્ક બની છે. મુંબઈની એક બ્રાન્ચમાં કામે લાગેલ આ રોબો બેન્કના ખાતેદારોને તેમના કામ મુજબ જુદા જુદા કાઉન્ટર સુધી દોરી જઈ શકે છે. એ પણ જાણી લેવા જેવું છે કે બેન્કે તેના ભારત ભરના કર્મચારીઓમાં ૪૫૦૦ જેટલા લોકોનો ઘટાડો કર્યો છે.
