અમેરિકાના સંરક્ષણ વિભાગનું ધાર્યું થશે તો આપણા કમ્પ્યુટરમાં કોઈ વાયરસ હશે તો તેનો ખાત્મો બોલાવવાનું કામ પણ પેન્ટાગોન કરશે!
એક સમાચાર અનુસાર અમેરિકન સંરક્ષણ તંત્રની ડીફેન્સ એડવાન્સ્ડ રિસર્ચ પ્રોજેક્ટ્સ એજન્સીએ આખા વિશ્વના ૮૦ ટકા આઈપી એડ્રેસ પરના કમ્પ્યુટર અને અન્ય સાધનોમાં ‘ઓટોનોમસ સોફ્ટવેર એજન્ટસ’ ઇન્સ્ટોલ કરીને તેમાં કોઈ વાયરસ હોય તો તેનો નાશ કરવાનો એક પ્રસ્તાવ તૈયાર કર્યો છે. આ એજન્સીએ બહુ ગાજેલા રેન્સમવેર અને પેટ્યા જેવા બોટનેટ્સ કે માલિશિયસ કોડ્સનો ઉલ્લેખ કરીને વિશ્વના કમ્પ્યુટર નેટવર્કસને વધુ સલામત બનાવવાની જરૂરિયાત હોવાનું કહ્યું છે.
જોકે, અમેરિકાની આવી પહેલ સામે વિશ્વભરમાંથી વિરોધ ઊઠે તેવી શક્યતા છે કારણ કે વાયરસનો ખાત્મો બોલવવાની સાથોસાથ પેન્ટાગોનને આપણા ડેટાની એક્સેસ પણ મળી જાય તેવી પૂરી શક્યતા છે!
