સોશિયલ મીડિયા પર તમે તમારી ફોરેન ટૂર કે નવી ખરીદેલી લકઝરી કારની તસવીરો શેર કરી હશે અને બીજી તરફ તમારે ભરવો જોઇતો ઇન્કમ ટેક્સ ભર્યો નહીં હોય તો સરકાર તમારી પાછળ પડી જશે.
ભારતની છઠ્ઠા ક્રમની સૌથી મોટી આઈટી કંપની લાર્સન એન્ડ ટોબ્રો ઇન્ફોટેકને ભારત સરકાર તરફથી આ માટે ૧૦ કરોડ ડોલરનો સત્તાવાર કોન્ટ્રાક્ટ મળ્યો છે, આ કંપની સિમેન્ટિક વેબ નામના કન્સેપ્ટનો ઉપયોગ કરીને ઇન્ટરનેટનો ઉપયોગ કરતી દરેક વ્યક્તિનો ખાસ્સો વિગતવાર પ્રોફાઇલ તૈયાર કરશે અને પછી તેના આધારે જે તે વ્યક્તિના ખર્ચની વિગતો અને તેમણે ભરેલા વેરાની વિગતો સરખાવવામાં આવશે.
સિમેન્ટિક વેબ ટેકનોલોજીની મદદથી ફેસબુક, ઇન્સ્ટાગ્રામ, ટવીટર વગેરે પરના વેરવિખેર ડેટાને કમ્પ્યુટર સિસ્ટમમાં એકઠો કરીને મશીન્સ તેને વાંચી-સમજી શકે તથા તેનું પ્રોસેસિંગ કરીને તેનું એનાલિસીસ પણ કરી શકે તેવા સ્વરૂપમાં ફેરવી શકાશે. મતલબ કે કોઈ વ્યક્તિની પત્ની દુબઈ કે સિંગોપોર જઇને શોપિંગ કરશે અને તેની તસવીરો ઇન્સ્ટાગ્રામ પર શેર કરશે તો તે પણ ઇન્કમ ટેક્સ ખાતાની નજરમાંથી બચશે નહીં.
