ગયા વર્ષે સ્માર્ટફોન્સની કિંમત સતત ઘટી અને ફિચર્સ સતત વધતા ગયાં એ ટ્રેન્ડ આ વર્ષે પણ ચાલુ રહેવાનો છે. મોટાભાગના સ્માર્ટફોનમાં જે કવોલકોમ સ્નેપ ડ્રેગન પ્રોસેસર હોય છે તેમાં આ વર્ષે હજી વધુ નવી ખાસિયતો ઉમેરાય તેવી શક્યતા છે. અલબત્ત શરૂઆતમાં આ ખૂબીઓ હાઇ-એન્ડ મોડેલ્સમાં જોવા મળશે.
આગળ શું વાંચશો?
- કેમકોર્ડરની ક્વોલિટીનું ઓડિયો સાઉન્ડ રેકોર્ડિંગ
- વાયરલેસ ૪કે સ્ટ્રીમિંગ
- એડવાન્સ્ડ કેમેરાઝૂમ
કેમકોર્ડરની ક્વોલિટીનું ઓડિયો સાઉન્ડ રેકોર્ડિંગ :
અત્યારે આપણે સ્માર્ટફોનમાં કોઈ ફંકશન કે ઇવેન્ટ સમયે વીડિયો રેકોર્ડિંગ કરીએ ત્યારે આપણે ઇચ્છતા હોઈએ એ સિવાયના સાઉન્ડ પણ રેકોર્ડ થઈ જતા હોય છે. હવે આ સ્થિતિ બદલાશે. નવા સ્માર્ટફોનમાં ૩ માઇક્રોફોન હશે જે આપણે ઇચ્છીએ તે મુજબ, એટલે કે સામેની તરફથી આવતા, બાજુની તરફથી આવતા કે ચારે તરફથી આવતા સાઉન્ડને રેકોર્ડ કરવાની સગવડ આપશે.
વાયરલેસ ૪કે સ્ટ્રીમિંગ :
અત્યારે ઘણા બધા એડવાન્સ સ્માર્ટફોન્સમાં ૪કે ક્વોલિટીનો વીડિયો શૂટ અને ડિસ્પ્લે કરવાનો વિકલ્પ મળે છે, પરંતુ આ વર્ષથી આ વીડિયોને કોઈ વાયરની મદદ વિના ૪કે ટીવી પર જોવાની સગવડ પણ મળશે.
એડવાન્સ્ડ કેમેરા ઝૂમ :
સ્માર્ટફોનના કેમેરા ધીમે ધીમે વધુ ને વધુ પાવરફુલ થતા જાય છે, પરંતુ તેમાં ઝૂમની સગવડ હજી પણ ડિજિટલ કેમેરાના સ્તરે પહોંચી નથી. આ વર્ષે કેમેરામાં નવી કમ્પ્યુટેશનલ ઝૂમ ટેક્નોલોજી અને લેન્સ સિસ્ટમ જોવા મળશે જેનાથી સ્માર્ટફોનના કેમેરામાં પણ ઘણા વધુ અસરકારક ઓપ્ટીકલ ઝૂમનો લાભ લઈ શકાશે.
