ટેક્નોલોજીથી આપણું જીવન સહેલું થવું જોઈએ, પણ ઘણી વાર થાય છે તેનાથી ઉલટું! જીવનની મનગમતી ક્ષણોને હંમેશા માટે સાચવી રાખવાનું કામ સ્માર્ટફોન થકી કેમેરા હંમેશા હાથવગા બનતાં તદ્દન સહેલું બન્યું, પરંતુ એ જ કારણે આપણે લીધેલા ફોટોગ્રાફ્સની સંખ્યા એટલી બધી વધી પડી કે તેમને મેનેજ કરવાનું મુશ્કેલ બની ગયું. ભવિષ્યમાં જોવાની મજા પડશે એવો વિચાર કરીને જે ફોટોગ્રાફ્સ લીધા હોય, એ જોઈએ ત્યારે મળી જ ન શકે તો શા કામના?
કમલેશભાઈ પરમાર અને તેમના જેવા બીજા સંખ્યાબંધ વાચકમિત્રોનો સવાલ હતો કે આપણા કમ્પ્યુટરમાં સેવ કરેલા ફોટોગ્રાફ આજીવન સાચવવા હોય તો સૌથી સારો રસ્તો કયો? મને પોતાને આ સવાલ હંમેશા સતાવતો હતો કેમ કે હાર્ડ ડિસ્ક કે એક્સટર્નલ ડ્રાઇવ ગમે ત્યારે ક્રેશ થઈ શકે, સીડી-ડીવીડી, પેનડ્રાઇવ વગેરે લાંબા ગાળે દગો દઈ શકે. બેકઅપ એકથી વધુ જગ્યાએ હોવો જોઈએ અને બધું અલગ અલગ સાચવવા જઈએ તો કયો ફોટોગ્રાફ ક્યાં હશે એનો ટ્રેક કેમ રાખવો?
ટેક્નોલોજીએ ઊભા કરેલા આ બધા સવાલના જવાબ ધીમે ધીમે ટેક્નોલોજી તરફથી જ મળી રહ્યા છે. યાહૂની ફ્લિકર સર્વિસ પર ૧ ટીબી સુધીની સ્ટોરેજ સાથે ફોટોગ્રાફ સેવ કરી શકાય છે તો ગૂગલે હમણાં શરૂ કરેલી સર્વિસ પર, થોડી મર્યાદાઓ સાથે બિલકુલ અનલિમિટેડ સ્ટોરેજ મળે છે! આ અંકની કવરસ્ટોરીમાં ફોટોઝ.ગૂગલ.કોમ સર્વિસનો મહત્તમ લાભ કઈ રીતે લઈ શકાય એની વિગતવાર વાત આલેખી છે. તમે આ સર્વિસનો ઉપયોગ કરતા હો તો તેની મુશ્કેલીઓ કે અનુભવો જરૂર શેર કરશો.
એ જ રીતે, ઘરખર્ચનો સાદો હિસાબ રાખવામાં સ્માર્ટફોન કેમ ઉપયોગી થઈ શકે એની સમજ તથા કારકિર્દી આયોજનની પાયાની માહિતી પણ આ અંકમાં આપી છે.
– હિમાંશુ