જો તમારી પાસે સ્માર્ટફોન હોય તો તમારા પોતાના ધ્યાનમાં આવે એ પહેલાં, તમે ડેસ્કટોપ કરતાં મોબાઇલમાં વધુ નેટ સર્ફિંગ કરતા થઈ ગયા હશો! મોબાઇલ બ્રાઉઝિંગ સતત વધી રહ્યું છે અને આ ક્ષેત્રની કેટલીક ગ્લોબલ કંપનીઓના આંકડા મુજબ, વર્ષ ૨૦૧૩માં દુનિયામાં જેટલું નેટ બ્રાઉઝિંગ થયું તેમાંથી ૨૧.૬ ટકા મોબાઇલ પર થયું. વર્ષની શરુમાં આ આંકડો ૧૩ ટકા હતો.
જો તમે પણ હવે વધુ ને વધુ મોબાઇલ પર સર્ફ કરતા થયા હશો તો તમને જાણીને નવાઈ લાગશે કે download.cnet.com સાઇટ પર જઈને આપણે મોબાઇલ બ્રાઉઝર ડાઉનલોડ કરવાનું વિચારીએ તો પૂરાં ૩૨૨ બ્રાઉઝરના વિકલ્પ મળે છે! અલબત્ત, આપણે ‘સૌ મેરે તો ગીરધર ગૂગલ, દૂસરા ન કોઈ…’ વાતમાં માનીએ છીએ એટલે તમે પણ મોબાઇલમાં ગૂગલ ક્રોમ બ્રાઉઝરનો જ ઉપયોગ કરતા હો તેવી પૂરતી શક્યતા છે. એ સાથે, એ પણ પૂરેપૂરું શક્ય છે કે અહીં આપેલી ઘણી વાત તમારા માટે પણ નવી હશે. તો જાણી લો, એન્ડ્રોઇડ કે એપલ ડિવાઇસીઝ પર ગૂગલ ક્રોમમાં બ્રાઉઝિંગ કરવાની કેટલીક સ્માર્ટ રીત!
