ઉત્તરાયણમાં ધાબે ચઢીને પતંગ ચગાવીએ ત્યારે આપણા સૌની નજર ક્યાં હોય? આકાશ પર. ઊંચે ઊડતી પતંગો પર. પણ ક્યારેય એવો વિચાર આવ્યો છે કે પતંગને આંખો હોય તો એને નીચે રહેલી ધરતી કેવી દેખાતી હશે? કાઇટ એરિયલ ફોટોગ્રાફી એ કોઈ નવી વાત નથી, પણ આ રીતે પતંગથી થતી ફોટોગ્રાફીને પોતાનું પ્રોફેશન બનાવી શકાય એવો વિચાર ચોક્કસ નવો છે. ભારતમાં જ સ્થાયી થયેલા આવા અનોખા ફોટોગ્રાફર છે નિકોલસ કોરિયર.
ઉપર આપેલી, નવી દિલ્હીના લોટસ ટેમ્પલની તસવીર પણ નિકોલસે પતંગની મદદથી ખેંચેલી છે!
પ્રોફેશનલ ફોટોગ્રાફર નિકોલસે છેલ્લાં ૧૫ વર્ષથી કાઇટ એરિયલ ફોટોગ્રાફી પર જ ફોકસ કર્યું છે અને એમના મતે, આ પદ્ધતિ જ ખરેખરી ઇકો-ફ્રેન્ડલી એરિયલ ફોટોગ્રાફી છે. નિકોલસની પતંગ પણ સ્પેશિયલી ડિઝાઈન કરેલી હોય છે, જરુરિયાત મુજબ પોતાની સાથે પ્રોફેશનલ સ્ટીલ કેમેરા કે એચડી વીડિયો કેમેરાને આકાશમાં લઈ જાય છે. નિકોલસ ધરતી પર રહીને રીમોટથી આ કેમેરાને ઓપરેટ કરે છે! નિકોલસ પોતાના પોર્ટેબલ ટીવીમાં કાઇટ કેમેરામાં ઝીલાતાં દૃશ્યો જોઈ શકે છે અને પરફેક્ટ એંગલ મળતાં એ ક્લિક કરે છે. નિકોલસ કહે છે કે આ રીતે તેઓ ૨૫૦ મીટરની ઊંચાઈ સુધી કેમેરાને લઈ જઈ શકે છે, પણ કાઇટ ફોટોગ્રાફીની ખરી મજા ઓછી ઊંચાઈએથી તસવીરો લેવામાં છે, જેથી ડીટેઇલિંગ સારું મળે.
નિકોલસ પોતાના શોખ માટે અથવા અસાઇન્મેન્ટ પર વિવિધ લોકેશન, યુનિવર્સિટી કે વિખ્યાત હોટેલ્સની કાઇટ ફોટોગ્રાફી કરે છે. તેમની ગેલેરી જોવા માટે પહોંચો : http://nicopix.zenfolio.com/
નિકોલસની ફોટોગ્રાફી પૂરતી ફુરસદે જોશો તો સમજાશે કે એમાં માત્ર એંગલની નવીનતા નથી, ખરેખર દિલથી માણવા જેવા આ ફોટોગ્રાફ્સ છે.