સામાન્ય રીતે ‘સાયબરસફર’ના પાને આપણે એવી જ વાતો કરીએ છીએ કે એ વાંચીને કે વાંચતાં વાંચતાં જ, મેગેઝિનનું ફીંડલું વાળીને તમે તમારા પીસી કે મોબાઇલ પર ત્રાટકી શકો અને અહીં જણાવેલી વાતોનો જાતઅખતરો કરી શકો!
‘હાલને હાલ, અત્યારે જ ઉપયોગી’ એ ‘સાયબરસફર’માં વિષય પસંદગીનો મુખ્ય મંત્ર રહ્યો છે, પણ ક્યારેક ભવિષ્ય તરફ નજર દોડાવવાનું પણ રસપ્રદ હોય છે. વાત નજીકના ભાવિની હોય ત્યારે એ જાણી લેવી જરૂરી પણ હોય છે.
આ વખતની કવર સ્ટોરી કંઈક એવી જ વાત કરે છે. આપણી આસપાસની ચીજો તપાસવા માટે પણ ગૂગલ જેવું કોઈ સાધન હોઈ શકે એ કલ્પના જ રસપ્રદ છે. ઇઝરાયેલની એક કંપનીએ આ દિશામાં ડગ માંડ્યા છે. એની શોધ કેટલી વિશ્વસનીય છે, એનાથી દુનિયા કેટલી બદલાશે એ આપણે અત્યારે કહી શકતા નથી, પણ આજના સમયમાં એક વિચાર ધીમે ધીમે એક વસ્તુનું સ્વરુપ કેવી રીતે લે છે અને એ વસ્તુ અસંખ્ય લોકોના હાથમાં કેવી રીતે પહોંચે છે એ આ વખતની કવર સ્ટોરી સમજાવે છે.
ગયા મહિને રજૂ થયેલી એલઆઇસીની ઓનલાઇન પોલિસીને યંગ જનરેશન વધાવી રહી છે, ત્યારે જીવનવીમાનું ખરું મહત્ત્વ શું છે અને ઓનલાઇન ખરીદીમાં કઈ વાતોની કાળજી જરુરી છે એ વાત પણ આ અંકમાં સમાવી છે.
એ રીતે, ઇન્ટરનેટ કરતાં ઘણી વધુ ઝડપે મોબાઇલ આપણા જીવનનું કેન્દ્ર બની રહ્યા છે. તેજ ગતિએ વિકસતા ક્ષેત્રમાં કેવાં કવાં પરિવર્તનો આવી રહ્યાં છે અને આ ક્ષેત્રમાં કારકિર્દીની કેવી તકો છે તેની વાતો રોશન રાવલે આલેખી છે. ‘સાયબરસફર’માં જોડાવું આપને લાભદાયી નીવડ્યું હોય તો મિત્રોને પણ તેની ભલામણ કરશો!
– હિમાંશુ કીકાણી
