માનવશરીરમાં જનીનનું છે એવું સ્થાન ઇલેક્ટ્રોનિક્સમાં ટ્રાન્ઝિસ્ટરનું ગણી શકાય, પરંતુ બેલ લેબોરેટરીઝના સંશોધકોએ આ દિવસે પહેલી વાર ટ્રાન્ઝિસ્ટરનો ડેમો આપ્યો, ત્યારે તેમને અંદાજ નહીં હોય કે તેમણે ‘વીસમી સદીની સૌથી અગત્યની શોધ’ કરી છે. ટ્રાન્ઝિસ્ટર – યુગ પહેલાં વપરાતી વેક્યુમ ટ્યૂબ્સ એટલી જંગી અને બિનભરોસાપાત્ર હતી કે તેનો વિકલ્પ શોધવાનું જ‚રી બન્યું. લગભગ એકાદ દાયકાના સંશોધન પછી ટ્રાન્સમીટર અને રેઝિસસ્ટરના ટુ-ઇન-વન સંયોજન જેવા તૈયાર થયા. તેનાથી વિદ્યુતતરંગોને અવરોધી શકાતા હતા તેમ જ શક્તિશાળી પણ બનાવી શકાતા હતા. એ રીતે સ્વિચ જેવું કામ આપતા ટ્રાન્ઝિસ્ટરના સહિયારા સર્જકો વિલિયમ શોકલી, જોન બાર્ડીન અને વોલ્ટર બ્રેટનને ૧૯૫૬માં ભૌતિકશાસ્ત્રનું નોબેલ પારિતોષિક મળ્યું. તેમની શોધને કારણે આખા ઓરડામાં પથરાયેલા કમ્પ્યુટરનો યુગ પૂરો થયો ને આધુનિક ઇલેક્ટ્રોનિક્સનો પાયો નખાયો, જેની પર કમ્પ્યુટરક્રાંતિની ભવ્ય ઇમારત ઊભી છે.

ટ્રાન્ઝિસ્ટરની તબક્કાવાર કથા :http://goo.gl/ydP4k