જેલની સજા થયા પછી ઘણા ગુનેગારોનું હૃદય પરિવર્તન થતું હોય છે. એવો જ એક કિસ્સો અમેરિકામાં બહાર આવ્યો. આ કેસમાંં ગુનેગાર માંડ ૨૬ વર્ષનો છે અને તેને સાયબર ફ્રોડના વિવિધ કેસમાં ગુનેગાર ઠર્યા પછી આઠેક વર્ષની જેલની સજા થઈ છે. સજા થયા પછી તેણે એક અખબારને ઇન્ટરવ્યૂ આપ્યો અને પોતે કેવી તરકીબ વાપરીને લોકોને છેતરતો હતો તેની વિગતવાર વાત કરી! આવું હૃદય પરિવર્તન કેમ થયું તેવા સવાલના જવાબમાં એ કહે છે કે ‘‘મને ઓલરેડી સજા થઈ ગઈ છે. મને લાગ્યું કે મારે લોકોને મદદ કરવાનો પ્રયાસ કરવો જોઇએ.’’

આ ગુનેગારનું નામ એરન જોન્સન. એરન વાત વાતમાં થોડી વાર માટે લોકોના આઇફોન કે આઇપેડ પોતાના હાથમાં લેતો હતો અને પછી સાવ નજીવી લાગે તેવી કરામત કરીને એ ડિવાઇસ પર પોતાનો કંટ્રોલ મેળવતો હતો. આવા કીમિયા કરીને તેણે ઓછામાં ઓછા ત્રણ લાખ ડોલર સેરવ્યા હોવાનું પોલીસનું કહેવું છે. જો કે એરન કહે છે કે કુલ આંકડો ઘણો મોટો હશે. ઓછામાં ઓછા ૧૦ થી ૨૦ લાખ ડોલર!

તો, એરને પોતે કહ્યા મુજબ એ કેવો કરતબ અજમાવતો હતો? એરન કહે છે કે એ મોટા ભાગે બાર કે ક્લબમાં જઇને કોલેજ સ્ટુડન્ટને ટાર્ગેટ કરતો હતો. તેમાં પણ છોકરાઓ કેમ કે એરનના મતે છોકરાઓની સરખામણીમાં છોકરીઓ વધુ સજાગ હોય છે અને એ સહેલાઈથી વાતચીતમાં ફસાતી નથી.

એરન કહે છે કે એ જેમને દારૂ ચઢી ગયો હોય એવા લોકોની પાસે જઇ તેમની સાથે વાતચીત શરૂ કરતો અને વાત વાતમાં તેમની સાથે સ્નેપચેટ પર કનેક્ટેડ રહેવાની ઓફર કરતો હતો. આવે સમયે તે સિફતથી ટાર્ગેટનો આઇફોન માગતો અને કહેતો કે એ પોતે જ સ્નેપચેટમાં ફ્રેન્ડ રિકવેસ્ટ મોકલી આપશે.

નશામાં ધૂત ટાર્ગેટને ખબર ન પડે કે શું ચાલી રહ્યું છે. એ બેધ્યાનપણે પોતાનો ફોન એરનને પકડાવી દે. દેખીતી રીતે આઇફોન લોક્ડ હોય એટલે એરન નિર્દોષપણે પાસકોડ પૂછે અને ટાર્ગેટ બીજી ભૂલ કરે. એ પોતાનો પાસકોડ કહી દે.

એરનને આટલું જ જોઇતું હોય. એ પાસકોડ યાદ રાખી લે અને આઇફોનમાં ઘૂસ્યા પછી તેના ટાર્ગેટને ખબર પડે તે પહેલાં ધડાધડ ટાર્ગેટના આઇફોનમાં તેનો એપલ આઇડી પાસવર્ડ બદલી નાખે. ‘ફાઇન્ડ માય આઇફોન’ જેવાં ફોનને ટ્રેક કરી શકાય તેવાં ફીચર ડીએક્ટિવેટ કરે અને તેનો પોતાનો ફેસઆઇડી એક્ટિવેટ કરી દે! આટલું કરતાં એરનને ટાર્ગેટના બધા પાસવર્ડ ધરાવતી આઇક્લાઉડ કીચેઇન વ્યવસ્થાની એક્સેસ પણ મળી જાય.

આઇફોનની બધી સિક્યોરિટી પર કંટ્રોલ મેળવ્યા પછી એરન ફોનમાં બેંકિંગ તથા ક્રિપ્ટોકરન્સીની કોઈ એપ હોય તો તે શોધવા લાગે. સાથોસાથ ફોનમાંની નોટ્સ, ફોટોઝ એપ ઓપન કરીને તેમાં સોશિયલ સિક્યોરિટી નંબર જેવું કંઈ શોધવામાં લાગી જાય.

એરનને જોઇતી બધી વિગતો મળી જાય એ પછી એ બેંક એકાઉન્ટ ખાલી કરવાનું શરૂ કરે અને તક મળે તો સ્ટોરમાં પહોંચીને એપલ પે સિસ્ટમની મદદથી ધડાધડ ખરીદી કરી લે.

એરન કહે છે કે નસીબ સારું હોય તો એ એક વિકએન્ડમાં ૩૦ જેટલા આઇફોન અને આઇપેડમાં આવી કરામત કરી લેતો હતો.