હજી હમણાં જ ‘સાયબરસફર’માં સમાંતર શિક્ષણની વાત કરી હતી. હવે ભારતમાં એક કોલેજમાં ઓફલાઇન ડિગ્રી કોર્સનો અભ્યાસ કરવાની સાથોસાથ બીજી કોઈ કોલેજમાંથી બીજી ડિગ્રી માટે ઓનલાઇન કોર્સ પણ કરી શકાય છે. આ પ્રકારે એક સાથે બે ડિગ્રી માટેના અભ્યાસને યુનિવર્સિટી ગ્રાન્ટ કમિશન (યુજીસી) દ્વારા માન્યતા આપવામાં આવી છે.

આઇઆઇટી-મદ્રાસનો કોર્સ

ઇન્ડિયન ઇન્સ્ટિટ્યૂટ ઓફ ટેકનોલોજી (આઇઆઇટી) મદ્રાસે આ સંદર્ભ સાથે ત્રણ અને ચાર વર્ષના ફુલફ્લેજ્ડ બીએસસી ડિગ્રી પ્રોગ્રામ શરૂ કર્યા છે. લર્નિંગ સંપૂર્ણપણે ઓનલાઇન અને વિદ્યાર્થીનું નિયમિત એસેસમેન્ટ ઓફલાઇન ક્વિઝ અને એક્ઝામ દ્વારા, એવું માળખું ધરાવતા આ કોર્સના મુખ્ય વિષય ડેટા સાયન્સ અને પ્રોગ્રામિંગ છે.

આ વર્ષે જેઇઇ એડવાન્સ્ડ માટે ક્વોલિફાય થયેલા તમામ વિદ્યાર્થીઓને આ કોર્સમાં ડાઇરેક્ટ એડમિશન મળી શકે છે.  આ કોર્સનો એક બેચ મે મહિનામાં શરૂ થઈ ગયો છે અને સપ્ટેમ્બર મહિનામાં નવો બેચ શરૂ થશે.

જેમાં એડમિશન માટે ઓગસ્ટ ૨૭, ૨૦૨૩ સુધીમાં એપ્લિકેશન કરી શકાય છે.

વધુ માહિતી માટે જુઓ https://study.iitm.ac.in/ds/

આઇઆઇટી-ગૌહાટીનો કોર્સ

એ જ દિશામાં આગળ વધતાં આઇઆઇટી- ગૌહાટીએ પણ તેનો પહેલો ફુલ ઓનલાઇન ડિગ્રી પ્રોગ્રામ લોન્ચ કર્યો છે. બેચલર ઓફ સાયન્સ (ઓનર્સ)ના આ ડિગ્રી પ્રોગ્રામમાં ડેટા સાયન્સ અને આર્ટિફિશિયલ ઇન્ટેલિજન્સ મુખ્ય વિષયો છે.

આ પ્રોગ્રામ કોર્સેરા (https://www.coursera.org/) પ્લેટફોર્મ પર કન્ડક્ટ કરવામાં આવશે.

આઇઆઇટી મદ્રાસની જેમ ગૌહાટીના આ કોર્સમાં પણ મલ્ટિ એન્ટ્રી અને મલ્ટિ એક્ઝિટ પોઇન્ટ્સ હશે. આ કોર્સ ઓછામાં ઓછો ૪ વર્ષનો રહેશે અને વધુમાં વધુ ૮ વર્ષમાં તેને પૂરો કરી શકાશે.

આઇઆઇટી મદ્રાસની જેમ ગૌહાટીના આ કોર્સમાં પણ પહેલું વર્ષ પૂરું કરતાં એડવાન્સ્ડ સર્ટિફિકેટ મળશે, બીજા વર્ષે ડિપ્લોમા મળશે, ત્રીજા વર્ષે બીએસસી ડિગ્રી મળશે અને ચોથા વર્ષે બીએસસી ઓનર્સ ડિગ્રી મળશે. આમાંના કોઈ પણ તબક્કે સર્ટિફિકેટ, ડિપ્લોમા કે ડિગ્રી મેળવ્યા પછી કોર્સ છોડી શકાશે.

આ કોર્સ પણ ધો.૧૨ પછી આઇટીમાં આગળ વધી રહેલા વિદ્યાર્થીઓ તેમ જ હાલ કોઈ ને કોઈ જોબમાં લાગેલા પ્રોફેશનલ્સને ધ્યાનમાં રાખીને તૈયાર કરવામાં આવ્યો છે. મદ્રાસની સરખામણીમાં ગૌહાટીના કોર્સમાં મુખ્ય તફાવત એ છે કે તેમાં વિદ્યાર્થીનું એસેસમેન્ટ પણ સંપૂર્ણપણે ઓનલાઇન જ કરવામાં આવશે.

વધુ માહિતી માટે જુઓ https://iitg.ac.in/acad/admission/online/