વોટ્સએપમાં છેલ્લા થોડા સમયથી ગ્રૂપના એડમિનને વધુ પાવર્સ મળી રહ્યા છે. પરંતુ તેની સાથોસાથ ગ્રૂપ એડમિનની જવાબદારીઓ પણ વધી રહી છે અને તે નિભાવવમાં ચૂક  થાય તો ગ્રૂપ એડમિન સામે કાયદેસર પગલાં પણ લેવાઈ શકે છે.

જેમ કે, હમણાં વોટ્સએપ કંપની ગ્રૂપ એડમિનને એક નવી સત્તા આપી છે – જો તમે કોઈ ગ્રૂપના એડમિન હો તો તેમાં અન્ય મેમ્બરે મૂકેલી પોસ્ટ તમે ડિલીટ કરી શકો છો. અત્યાર સુધી આવી સગવડ જે તે વ્યક્તિને પોતાને જ મળતી હતી.

હવે ધ્યાનથી આ વાત સમજજો – એડમિન ગ્રૂપમાં કંઈ પણ વાંધાજનક પોસ્ટ મૂકાય તો તેને ડિલીટ કરી શકે છે, જો તે તેમ ન કરે તો આવી સગવડ હોવા છતાં, એડમિન તેનો ઉપયોગ ન કરે તો ગ્રૂપમાંની વાંધાજનક પોસ્ટ માટે તે કાયદાની રીતે જવાબદાર ઠરી શકે છે. એડમિન માટે મુશ્કેલી એ છે કે તેને માત્ર કંઈક વાંધાજનક દેખાય તે પછી તેને ડિલીટ કરવાની સત્તા છે, કોઈ પણ મેસેજ ગ્રૂપમાં પોસ્ટ થાય તે પહેલાં તેને તપાસવાની એડમિનને કોઈ સત્તા કે સગવડ નથી.

ઉપરાંત જો એડમિન કંઈક વાંધાનજક દેખાતાં તેને ડિલીટ કરે તો પણ એ ગ્રૂપમાં સામેલ તમામ મેમ્બર્સ વોટ્સએપના લેટેસ્ટ વર્ઝનનો ઉપયોગ કરતા હોય તો જ તે પોસ્ટ બધા માટે ડિલીટ થાય છે.

આ બધાનો અર્થ એ થયો કે ગ્રૂપના કોઈ મેમ્બરની વાંધજનક પોસ્ટનો વિવાદ ઊભો થાય તો એડમિન તેમાં ફસાઈ શકે છે.

આપણે શું ધ્યાન રાખવું?

વોટ્સએપના ગ્રૂપની એક મોટી તકલીફ એ છે કે તેમાં આપણે કોઈ ગ્રૂપમાં મેમ્બર હોઇએ અને એ ગ્રૂપના એક માત્ર એડમિન જો ગ્રૂપ છોડી જાય તો પછી ગ્રૂપમાંની અન્ય વ્યક્તિ આપોઆપ ગ્રૂપની એડમિન બની જાય છે. એટલે એવું બની શકે કે તમે અત્યારે કોઈ ગ્રૂપના એડમિન હો અને તમને તેની જાણ જ ન હોય!

બીજી મુશ્કેલી એ છે કે જો ગ્રૂપમાં તમે એક માત્ર એડમિન હો તો તમે અન્ય વ્યક્તિને એડમિન બનાવી શકો પરંતુ તમે પોતે, જાતે એડમિનની જવાબદારીથી છટકી ન શકો! એટલે કે તમારે ગ્રૂપમાં રહેવું હોય, પરંતુ એડમિન તરીકે નહીં, માત્ર સાદા મેમ્બર તરીકે તો એ કામ આપણે જાતે કરી શકતા નથી. એ માટે આપણે અન્ય કોઈ વ્યક્તિને એડમિન બનાવવી પડે, પછી તેને કહેવું પડે કે તે આપણને એડમિન તરીકે દૂર કરે.

બીજો એક રસ્તો એ ગ્રૂપમાંથી એક્ઝિટ થવાનો છે. એ પછી ગ્રૂપમાં જે વ્યક્તિ નવી એડમિન બને તેને વિનંતી કરીને આપણે ફરી ગ્રૂપમાં સાદા મેમ્બર તરીકે જોડાઈ શકીએ.

હજી ત્રીજો રસ્તો પણ છે. એડમિન તરીકે આપણે ગ્રૂપમાં જોડાવા માટેની ઇન્વાઇટ લિંક તૈયાર કરી શકીએ છીએ. એવી લિંક બનાવીને આપણે બીજે ક્યાંય પણ સેવ કરી રાખીએ અને પછી ગ્રૂપમાંથી એક્ઝિટ થઇએ તો ગ્રૂપમાંની અન્ય કોઈ વ્યક્તિ એડમિન બનશે અને આપણે પેલી ઇન્વાઇટ લિંકનો ઉપયોગ કરીને ગ્રૂપમાં ફરી જોડાઈ શકીશું! અજાણ્યા લોકોના ગ્રૂપમાં એક માત્ર એડમિન હોવામાં જોખમ છે કારણ કે એ ગ્રૂપમાં કંઈ પણ અયોગ્ય પોસ્ટ થાય તો તેની જવાબદારી એડમિન પર આવી શકે છે.

ટ્વીટર પર લાંબા સમયથી એડિટ બટન ચર્ચામાં રહ્યું છે. ટ્વીટર પર આપણે કંઈ પણ ટ્વીટ કરીએ એ પછી એમાં ફેરફાર કરવાની સગવડ આ એડિટ બટનથી મળશે. અલબત્ત આપણા સુધી તેનો લાભ મળતાં હજી લાંબો સમય નીકળી જાય તેવું લાગે છે.

હાલમાં ટ્વીટરના પોતાના એમ્પ્લોઇઝ માટે એડિટ બટનની ટ્રાયલ શરૂ થશે. એ પછી ટ્વીટરના પેઇડ વર્ઝનનો લાભ લેતા લોકોને આ સગવડ મળશે અને તેનાં પરિણામોના આધારે આપણા સુધી આ લાભ પહોંચશે કે નહીં તે નક્કી થશે.