ગૂગલ પ્લે સ્ટોરમાંથી ડાઉનલોડ કરેલી એપ્સમાંથી તમે કોઈ ખરીદી કરો ત્યારે તે એપની ડેવલપર કંપનીએ તેને મળેલી રકમમાંથી ૩૦ ટકા જેટલો ઊંચો ભાગ ગૂગલને ચૂકવવો પડે છે! એક સામાન્ય છાપ એવી છે કે ડિજિટલ કન્ટેન્ટની ડેવલપર કંપનીને કોઈ ખર્ચ હોતો નથી પરંતુ હકીકત જુદી છે. એપ અને કન્ટેન્ટ ડેવલપમેન્ટ, સર્વર હોસ્ટિંગ વગેરે ખર્ચાળ છે જ અને તેમાં પ્લેસ્ટોરને ચૂકવવું પડતું ઊંચું કમિશન ઘણા ડિજિટલ બિઝનેસનું ગણિત ખોરવી નાખતું હોય છે. સામાન્ય, નાની એપના ડેવલપરથી માંડીને જગત આખામાં પેઇડ યૂઝર્સ ધરાવતી વિશાળ કંપનીઓ આ બાબતે અવારનવાર ફરિયાદ કરતી રહી છે.

હવે ગૂગલે આ ફરિયાદ સાંભળી હોય તેવું લાગે છે. ગયા માર્ચ મહિનામાં ગૂગલે જાહેરાત કરી હતી કે તેના પ્લેસ્ટોરમાં હોસ્ટ થતી એપમાંથી એપ ડેવલપર એક વર્ષમાં, પહેલા ૧૦ લાખ ડોલરની કમાણી કરે ત્યાં સુધી તેણે ગૂગલને ચૂકવવી પડતી સર્વિસ ફી માત્ર અડધી ચૂકવવાની રહેશે. એપલ કંપનીએ પણ કંઈક આ પ્રકારનું સર્વિસ ચાર્જ મોડલ અપનાવ્યું છે.

હવે ગૂગલે હજી વધુ રાહત આપવાનું નક્કી કર્યું છે. ગયા મહિને તેણે જાહેરાત કરી છે કે પ્લે સ્ટોરમાંની સબસ્ક્રિપ્શન આધારિત એપ્સે ગૂગલને ૧૫ ટકા ચૂકવવાના રહેશે. અત્યાર સુધી ગૂગલ કંપની પહેલા વર્ષે ૩૦ ટકા અને પછીના વર્ષથી ૧૫ ટકા સર્વિસ ફી લેતી હતી. એ ઉપરાંત ઇ-બુક કંપનીઝ અને મ્યુઝિક સ્ટ્રીમિંગ સર્વિસિસ માટે આ દર ૧૦ ટકા જેટલો નીચો રાખવામાં આવ્યો છે. આ ફેરફાર આવતા વર્ષે જાન્યુઆરીથી લાગુ થશે.