લગભગ લોકડાઉન જેવા દિવસો દરમિયાન તમે રસોડામાં કોઈ નવી રેસિપી ટ્રાય કરી? ચાહો તો, તમારા ફોનના કેમેરામાં ‘ફૂડ’ ફિલ્ટર હોય તો એ મોડમાં એક મજાનો ફોટો લઈ, વોટ્સએપમાં ફેમિલી ગ્રૂપમાં શેર કરો. અથવા, એક સ્ટેપ આગળ વધીને કૂકિંગનાં બધાં સ્ટેપનો વીડિયો કેપ્ચર કરો અને પછી ઇન્સ્ટાગ્રામ, ફેસબુક કે યુટ્યૂબ પર શેર કરો!

તમે ઇચ્છો તો આ વીડિયોને પ્રોફેશનલ ટચ પણ આપી શકો – તમારા સ્માર્ટફોનમાંની જ કોઈ ફ્રી વીડિયો એડિટિંગ એપની મદદથી!

વીડિયો હવે માત્ર જોવાનું માધ્યમ રહ્યું નથી, સૌ કોઈને વીડિયો ક્રિએશનમાં પણ રસ પડ્યો છે. હજી થોડા સમય પહેલાં સુધી વીડિયો એડિટિંગ પ્રોફેશનલ્સનું કામ હતું (હજી પણ છે!), પરંતુ હવે સ્માર્ટફોનને કારણે જેમ વીડિયો શૂટિંગ સાવ સહેલું થઈ ગયંું છે, તેમ ફક્ત મોજ માટે વીડિયોનું એડિટિંગ કરવું પણ સહેલું બન્યું છે. વાત ફક્ત મોજ માટે હોય એનો અર્થ એ નથી કે આપણે ફીચર્સમાં કોમ્પ્રોમાઇઝ કરવાં પડે, એ તો પ્રોફેશનલ સોફ્ટવેર જેવાં જ મળશે!

વીડિયો જોવાની સાથે સાથે વીડિયો ક્રિએટ કરવાનું પ્રમામ પણ વધ્યું છે ત્યારે સંખ્યાબંધ એપ્સ વીડિયો એડિટિંગનાં પ્રોફેશનલ ફીચર્સ આપવા લાગી છે.

અહીં છ વીડિયો એડિટિંગ એપ્સની વાત કરી છે. મોટા ભાગની એપ્સ એન્ડ્રોઇડ અને આઇઓએસ બંને માટે ઉપલબ્ધ છે. આમાંની ઘણી ખરી એપનાં ડેસ્કટોપ વર્ઝન પણ છે, પણ અહીં ફોકસ સ્માર્ટફોન એપ પર જ રાખ્યું છે.

આ દરેકનાં બેઝિક વર્ઝન ફ્રી છે. મોટા ભાગની એપમાં વોટરમાર્ક કે વીડિયોની ટાઇમલિમિટ પણ નથી, છતાં ફીચર્સ જાતભાતનાં છે.

લગભગ આ બધી એપ્સનાં ડેસ્કટોપ વર્ઝન છે, પરંતુ સ્માર્ટફોનમાં પણ સહેલાઈથી ઉપયોગ કરી શકાય છે.

લગભગ બધી એપના બેઝિક કન્સેપ્ટ એક સરખા છે, ફક્ત તમારે તેનાથી પરિચિત થવું પડશે. તમે જોશો તેમ આ બધી એપ્સમાં કોઈ ને કોઈ આગવી ખાસિયત છે. ફોટો સ્ટોરેજ અને શેરિંગ માટે સૌથી સારી ગણાતી ગૂગલ ફોટોઝ એપ, આ લિસ્ટમાં સૌથી ઓછાં ફીચર્સ ધરાવતી એપ છે, તો એડોબ પ્રીમિયર એપ મફતમાં બહુ મર્યાદિત હોવા છતાં, પાવરફુલ ફીચર્સ જોવા-સમજવા માટે સામેલ કરી છે. હમણાં તમારી પાસે ફુરસદ વધુ હોય તો આવી એપ્સ પણ તપાસવા જેવી છે. હા, એ યાદ રાખશો કે આ એપ્સને આપણે પોતાના વીડિયો-ફોટોની એક્સેસ આપ્યા વિના છૂટકો નથી!