સ્માર્ટફોન કે પીસી/લેપટોપમાં જીમેઇલનો ઉપયોગ કરતી વખતે તેમાં ‘આર્કાઇવ’ શું છે એ વિશે ઘણા લોકોને થોડી મૂંઝવણ રહેતી હોય છે.
કેટલાક લોકોને આ આર્કાઇવને કારણે થતી એક જુદી સમસ્યા સતાવતી હોય છે. એમને ક્યારેક પોતાના કોઈ ઈ-મેઇલ ‘ગાયબ’ થઈ ગયા હોય એવું લાગતું હોય છે.
જીમેઇલમાં આર્કાઇવ એ બીજું કંઈ નહીં પણ આપણા પર આવેલા મેઇલ્સને ફક્ત ઇનબોક્સમાંથી દૂર કરવાનો એક રસ્તો છે, જેથી ઇનબોક્સ બહુ ભરાયેલું ન રહે અને આપણને બિનજરૂરી સ્ટ્રેસ ન આપે!
જીમેઇલમાં તમારા ઇનબોક્સમાં આવેલા અને જે મેઇલ પર હવે આપણે કોઈ કામ કરવાનું બાકી ન હોય પરંતુ ભવિષ્યના ઉપયોગ માટે તેને સાચવી રાખવા જરૂરી હોય એ મેઇલને સિલેક્ટ કરીને આર્કાઇવ બટન પર ક્લિક કરીને ઇનબોક્સમાંથી ‘ઓલ મેઇલ’ ફોલ્ડરમાં મોકલી શકાય છે.
આથી જો તમને ક્યારેક એવું લાગે કે તમારો કોઈ મેઇલ ગાયબ થઈ ગયો છે તો ભૂલથી આર્કાઇવ થઈ ગયો હોય એવું બની શકે. તમે તેને ઓલમેઇલ ફોલ્ડરમાં જઇને શોધી શકો છો અને જરૂરી હોય તો અહીં તેને સિલેક્ટ કરીને ફરી ઈનબોક્સમાં મોકલી શકો છો.
મોબાઇલમાં જીમેઇલના સેટિંગ્સમાં જઇને મેઇલને ડાબે કે જમણે સ્વાઇપ કરીને આર્કાઇવ અથવા ડિલીટ કરી શકાય એવું સેટિંગ કરી શકાય છે.
