ઇન્ટરનેટ પર સર્ફ કરતી વખતે તમે માઉસથી ક્લિક કરી દો અને પછી મગજમાં ઝાટકો વાગે કે ‘અરે ક્લિક નહોતું કરવાનું!’ આવું તમારી સાથે થાય છે?
જેમ કે, વેબ બ્રાઉઝિંગ કરતી વખતે તમે એક પછી એક ટેબ ઓપન કરતા જ જાવ અને પછી જ્યારે ટેબ્સનો ખૂબ ભરાવો થઈ જાય ત્યારે બિનજરુરી ટેબ્સ બંધ કરવાનું શરુ કરીએ ત્યારે આવી ભૂલ થવાની ઘણી શક્યતા હોય છે. મજાની વાત એ છે કે મોટા ભાગે ક્લિક કરતાંવેંત આપણને ખ્યાલ આવે છે કે અરે, ભૂલ થઈ ગઈ!
સદનસીબે તેનો એક ઉપાય છે.
આપણે ભૂલથી ક્લિક કરીએ અને માઉસ બીજે ખસેડ્યા પહેલાં ખબર પડે કે ભૂલ થઈ ગઈ તો માઉસનું બટન રીલિઝ કર્યા વિના માઉસ એરો પેજમાં બીજે ગમે ત્યાં લઈ જઈને પછી માઉસનું બટન રીલિઝ કરશો, તો જે તે ટેબ બંધ કરવાનું પહેલું ક્લિક એક્શન કેન્સલ થશે અને આપણે કામની ટેબ ભૂલથી બંધ થશે નહીં!
