જો તમે તમારા કામકાજ માટે જીમેઇલનો ભરપૂર ઉપયોગ કરતા હો તો તમારો અનુભવ હશે કે આપણને આવેલા ઈ-મેઇલ પર આપણે આગળ શું કામ કરવાનું છે તેની ટૂંકી નોંધ કરવાની સગવડ મળે તો બહુ ઉપયોગી થાય.
કારણ સાદું છે.
કોઈ આપણને ઈ-મેઇલ મોકલે ત્યારે જો તેમાં એ વિશેની પૂરતી ચોખવટ ન કરી હોય તો આપણે તેમની સાથે ફોન પર વાત કરીને સ્પષ્ટતા મેળવવી પડે છે. આ સ્પષ્ટતા અને એ વ્યક્તિએ મોકલેલા ઈ-મેઇલ વચ્ચે સીધો સંબંધ છે, પરંતુ બંનેને એકમેક સાથે કનેક્ટ કેવી રીતે કરવા?
કમનસીબે જીમેઇલમાં આપણને એવી કોઈ સગવડ મળતી નથી કે આપણા પર આવેલા ઈ-મેઇલ પર આપણે પોતાની કોઈ નોંધ ઉમેરી શકીએ.
જોકે આનો એક સ્માર્ટ ઉપાય છે.
પીસીમાં જીમેઇલ ઓપન કર્યા પછી જમણી તરફના બારમાં ગૂગલ ટાસ્કનું એક બટન જોવા મળે છે. સ્માર્ટફોનમાં જે તે ઈ-મેઇલ ઓપન કર્યા પછી ત્રણ ડોટ પર ક્લિક કરી તેને ગૂગલ ટાસ્ક્સમાં ઉમેરવાની સગવડ મળે છે.
આ રીતે ઈ-મેઇલને ટાસ્ક તરીકે સેવ કર્યા પછી તેમાં આપણે ઇચ્છીએ તે વધારાની વિગતો તેમજ એ ઇ-મેઇલ પર ક્યા દિવસે અને કઈ તારીખે કામ કરવાનું છે તેની નોંધ ઉમેરી શકીએ છીએ.
ટાસ્ક્સમાં ફક્ત એક ક્લિકથી આપણે એ ઈ-મેઇલ પણ ઓપન કરી શકીએ છીએ. ટાસ્ક્સ સુવિધા ગૂગલે આપી હોવા છતાં તેમાં હાલમાં સર્ચની સુવિધા નથી – આ તેની બહુ મોટી મર્યાદા છે.
