દક્ષિણ અમેરિકામાં બ્રાઝિલમાં એમેઝોનનાં જંગલોમાં દાવાનળની સંખ્યા અને વ્યાપ વધી રહ્યાં છે અને આખા વિશ્વને તેની દૂરગામી અસરોની ચિંતા થવા લાગી છે. સેલિબ્રિટિઝ સોશિયલ મીડિયા પર દાવાનળની તસવીરો સાથે ક્લાઇમેટ ચેન્જ સામે આક્રોષ ઠાલવી રહ્યા છે, પણ આ તસવીરો બહુ જૂની હોવાનું બહાર આવી રહ્યું છે!
હવે એમ પણ બહાર આવી રહ્યું છે કે એમેઝોનનાં જંગલોમાં આગ, કહેવાય છે એટલી અભૂતપૂર્વ નથી અને તેનું મુખ્ય કારણ ક્લાઇમેટ ચેન્જ પણ નથી.
તેમ છતાં એમેઝોનનાં જંગલોમાં વિસ્તરતી આગ ચિંતાનો વિષય જરૂર છે. તેની અસર ખરેખર કેટલી ગંભીર છે એ દર્શાવવા માટે અમેરિકન સંસ્થા નાસાએ એક વિઝ્યુઅલાઇઝેશન તૈયાર કર્યું છે. તેમાં તેના એક્વા સેટેલાઇટ પરના એટ્મોસ્ફરિક ઇન્ફ્રારેડ સાઉન્ડર નામના સાધને મેળવેલા ડેટાથી, જંગલોમાં આગને કારણે વાતાવરણમાં કેટલો કાર્બન ડાયોક્સાઇડ ઉમેરાઈ રહ્યો છે તે દર્શાવાયું છે.
આ વિઝ્યુઅલાઇઝેશનમાં, ઓગસ્ટ ૮ થી ૨૨, ૨૦૧૯ સુધી આગવાળા વિસ્તારોથી ૧૮,૦૦૦ ફૂટની ઊંચાઈએ કાર્બન ડાયોક્સાઇડનું પ્રમાણ માપીને ઘેરા લાલ રંગથી દર્શાવવામાં આવ્યું છે. નાસાના જણાવ્યા અનુસાર, લાંબા ગાળે તેનાથી હવાનું પ્રદૂષણ અને ક્લાઇમેટ ચેન્જ બંને પર અસર થઈ શકે છે.
આ વિઝ્યુઅલાઇઝેશન જુઓ અહીં : https://www.nasa.gov/feature/jpl/nasas-airs-maps-carbon-monoxide-from-brazil-fires