જો તમારી પાસે ચાઈનીઝ મોબાઈલ કંપની હુવેઈનો સ્માર્ટફોન હશે તો ગૂગલ અને હુવેઈ વચ્ચેના ગજાગ્રહના સમાચારથી તમે ચિંતામાં મુકાયા હશો.
હુવેઈ કંપની યુએસની રાષ્ટ્રીય સલામતી વિરુદ્ધની પ્રવૃત્તિઓ કરી રહી હોવાનું જણાતાં યુએસના ડિપાર્ટમેન્ટ ઓફ કોમર્સે આ કંપનીને પ્રતિબંધિત કંપનીઓની યાદીમાં ઉમેરી દીધી છે. યુએસની કોઈ કંપની યુએસ સરકારની મંજૂરી વિના આ યાદીમાંની કોઈ પણ કંપની સાથે પોતાની ટેકનોલોજી ટ્રાન્સફર કરી શકતી નથી.
આથી ગૂગલે હુવેઈ કંપનીને મળતા એન્ડ્રોઇડ ઓપરેટિંગ સિસ્ટમના લાભ અટકાવી દીધા છે. અલબત્ત ગૂગલે સ્પષ્ટતા કરી છે કે આ કારણે હાલમાં હુવેઈ સ્માર્ટફોન ધરાવતા લોકો માટે કંઈ પણ બદલાશે નહીં.
એ ખાસ નોંધવા જેવું છે કે સમગ્ર વિશ્વના એન્ડ્રોઇડ સ્માર્ટફોન માર્કેટમાં સેમસંગ પછી હુવેઈ બીજા ક્રમની સૌથી મોટી કંપની છે.
ગૂગલના પ્રતિબંધને કારણે હુવેઈના ભવિષ્યના સ્માર્ટફોન પર મોટો પ્રશ્નાર્થ મૂકાઈ ગયો છે. એન્ડ્રોઇડ ઓપન સોર્સ ઓપરેટિંગ સિસ્ટમ હોવાથી હુવેઈ તેનો કદાચ ઉપયોગ કરી શકશે પરંતુ તેમાંની ગૂગલ પ્લે સ્ટોર અને અન્ય વિવિધ એપ્સ ગૂગલની પોતાની માલિકીની છે આથી તેનો ઉપયોગ હુવેઈના ભવિષ્યના સ્માર્ટફોનમાં થઈ શકશે નહીં. હવે હુવેઈ કંપનીએ એન્ડ્રોઇડના અન્ય વિકલ્પો શોધવાનું શરૂ કર્યું છે.
