વોટ્સએપમાં તમે જાણતા હશો તેમ કોઈ મિત્ર સાથેની ચેટમાં કે ગ્રૂપમાંની ચેટમાં કોઈ એક મેસેજના સંદર્ભમાં તમારે જવાબ વાળવો હોય ત્યારે એ મેસેજનો સંદર્ભ આપી શકાય છે.
એ માટે આપણે એ મેસેજ જરા લાંબો સમય પ્રેસ કરીને સિલેક્ટ કરીએ એટલે મથાળે ડાબી તરફ જતા તીરની નિશાની મળે તેને ક્લિક કરતા આપણા મેસેજની ઉપર એ મેસેજનો સંદર્ભ ઉમેરાય જાય જેને ક્લિક કરીને સામેની વ્યક્તિ તરત જ એ મેસેજ સુધી પહોંચી શકે.
એ સિવાય જે મેસેજનો સંદર્ભ આપવો હોય તેને જમણી બાજુ સ્વાઇપ કરવાથી પણ આ જ કામ થઈ શકે છે.
આને ‘થ્રેડેડ રિપ્લાય’ કહે છે. હવે ફેસબુકની મેસેન્જર એપમાં પણ આ સગવડ ઉમેરાઈ છે.
કોઈ મિત્ર સાથે કે ગ્રૂપમાં સંખ્યાબંધ લોકો સાથે તમે ચેટ કરી રહ્યા હો ત્યારે કોઈ ચોક્કસ મેસેજના સંદર્ભમાં આપણો મેસેજ ઉમેરવા માટે તમારે જે તે મેસેજને જરા લાંબો સમય પ્રેસ કરવાનો થશે. હવે એ મેસેજના સંદર્ભે ઇમોજી મોકલવાની જૂની સગવડ ઉપરાંત જમણી તરફ તીરનું બટન જોવા મળશે. તેને ટીક કરવાથી આપણા મેસેજમાં એ મેસેજ સંદર્ભ ઉમેરાઈ જશે.
આ રીતે તમે જિફ, વીડિયો, ઇમોજી, ટેક્સ્ટ કે ફોટો મેસેજને પણ રિપ્લાય કરી શકો છો.