સિમેન્ટેક નામની જાણીતી સાયબર સિક્યોરિટી કંપનીએ વર્ષ ૨૦૧૮ માટેનો ઇન્ટરનેટ સિક્યોરિટી થ્રેટ રિપોર્ટ હમણાં પ્રકાશિત કર્યો છે. આ રિપોર્ટ મુજબ મોબાઇલમાં માલવેરના ઇન્ફેકશનની દૃષ્ટિએ ભારત વિશ્વના ટોચના દેશોમાં સામેલ છે. રેન્સમવેર એટેકના મામલે પણ ભારત વિશ્વમાં બીજા નંબરે છે.
આ રિપોર્ટ અનુસાર સ્માર્ટફોન હેકર્સ માટે સૌથી સારા જાસૂસી સાધન સાબિત થઈ રહ્યા છે કારણ કે તેમાં કેમેરા, લોકેશન ટ્રેકિંગ સામેલ છે અને ફોનધારકને સહેલાઈથી સાંભળી પણ શકાય છે. રિપોર્ટ અનુસાર એન્ડ્રોઇડની ૪૫ ટકાથી વધુ લોકપ્રિય એપ્સ ડિવાઇસ લોકેશન, કેમેરા અને ઇમેઇલ એડ્રેસની એક્સેસ માગે છે, જ્યારે આઇઓએસ એપ્સમાં આ પ્રમાણ ૨૪ ટકા છે.
